A UDC traslada á vicepresidenta o proxecto para converter a Cidade das TIC no Nodo da Estratexia Nacional en IA
luns, 10 de maio do 2021
O
reitor da Universidade da Coruña, Julio Abalde, reuniuse este 10 de
maio coa vicepresidenta Nadia Calviño para, entre outras cousas,
presentarlle os detalles do proxecto para converter a antiga Fábrica
de Armas na Cidade das TIC e do plan para transformar este novo
complexo innovador na sede do Nodo da Estratexia Nacional de
Intelixencia Artificial. A reunión foi previa á intervención da
ministra de Asuntos Económicos e Transformación Dixital no salón
de actos da Facultade de Economía e Empresa onde mantivo unha
charla-coloquio co alumnado sobre Perspectivas de economía e plan
de recuperación.
Na
xuntanza tamén estiveron presentes o delegado do Goberno en Galicia,
José Miñones, o decano da dita facultade, Manuel Gómez, e o
ex-presidente de Galicia e profesor da UDC, Fernando González Laxe.
A
vicepresidenta manifestou o seu interese polo proxecto da Cidade das
TIC, incluído dentro das propostas do Goberno autonómico aos fondos
Next Generation.
Julio
Abalde baseou a súa proposta para ser sede do nodo de IA en España
no “peso investigador e docente da UDC no ámbito tanto da
Informática como da Intelixencia Artificial posicionándose a
Universidade da Coruña como líder en Galicia nestes ámbitos”.
A
UDC, líder en IA en Galicia
O
reitor fixo saber que a UDC abrangue a día de hoxe ao 74% do
profesorado galego da área de Ciencias da Computación e
Intelixencia Artificial, e máis da metade do alumnado e dos
titulados en Informática de todo o Sistema Universitario Galego
(SUG), ao que engadiu o carácter referencial do Centro de
Investigación en TIC (CITIC) da UDC, que “é o primeiro centro
singular do SUG en TIC e o maior en Intelixencia Artificial de
Galicia”, amais de ser un modelo de traballo en áreas como a
Ciencia e Enxeñaría de Datos, a Computación de Altas Prestacións,
os Servizos e Redes Intelixentes e a Ciberseguridade.
A
charla presencial da vicepresidenta Calviño foi seguida tamén por
streaming debido ao límite de aforo do salón de actos, que
se completou con máis de cen asistentes. Na súa intervención, a
ministra avanzou que a recuperación económica española comezará a
verse no segundo semestre deste ano. Nadia Calviño destacou as
prioridades da súa política económica que teñen como primeira
medida seguir avanzando na vacinación para continuar coa protección
da economía e o emprego, a consecución de estabilidade financeira e
o despregue das reformas e investimentos do Plan de recuperación,
que se sustenta en catro eixes, transformación verde,
dixitalización, cohesión social e territorial e igualdade de
xénero.