A UDC saca a concurso o deseño do futuro edificio CITIC. Cidade das TIC

O proxecto para converter a antiga Fábrica de Armas da Coruña na Cidade das TIC, impulsado pola Universidade da Coruña, o Clúster TIC e o Concello, entre outras entidades, vén de marcar un novo fito no seu desenvolvemento. Fíxoo coa proxección do edificio que representará á UDC no conxunto da futura cidade da tecnoloxía: o novo Centro de Investigación en Tecnoloxías da Información e as Comunicacións (CITIC).
A UDC publicou un concurso de ideas dirixido a arquitectos/as e estudantes de Arquitectura para que propoñan os seus deseños do que será o “CITIC. Cidade das TIC”, que deberá concibirse “como un elemento de gran relevancia arquitectónica priorizando en todo momento a sustentabilidade da infraestrutura e da súa contorna”, sinálase nas bases.
O concurso de ideas con xurado prevé a concesión de tres premios económicos: un primeiro premio de 20.000 euros, un segundo de 10.000€ e un terceiro premio de 7.000€. Con todo, o xurado ten a opción de destacar os traballos que considere con mencións honoríficas.
As bases do concurso poden consultarse na páxina web do CITIC, desde onde se terá acceso a toda a documentación complementaria para a elaboración das propostas.
Como dixemos, o novo edificio estará situado na Cidade das TIC, complexo industrial histórico que se está proxectando nos terreos da antiga Fábrica de Armas da Coruña, cedidos á UDC polo Ministerio de Defensa co obxectivo de “impulsar unha estratexia urbana para crear un polo de de desenvolvemento de Tecnoloxías da Información e a Comunicación que sexa unha referencia a nivel nacional e internacional. A futura cidade tecnolóxica conta co apoio explícito de todas as administracións para contribuír á especialización de Galicia en tecnoloxías emerxentes.
O “CITIC. Cidade das TIC” situarase na zona que se define como centro I+D+i e nodo de Intelixencia Artificial, unha localización que a UDC cualifica de “emprazamento estratéxico de posición elevada e moi visíbel desde o exterior, o que intensificará a súa condición de edificio de referencia dentro do complexo”. Deseñarase para unha superficie inicial duns 6.500 metros cadrados construídos, pero incorporará a posibilidade de crecer ata o dobre sen perder a súa esencia e mantendo a súa condición de fito.
O prazo de entrega de propostas esténdese ata o 10 de novembro.