A Deputación de Pontevedra lanza unha iniciativa para asentar o sector turístico no eido dixital: TurisTIC
venres, 1 de xuño do 2018
A
Deputación de Pontevedra, amais
de presentar as súas principais liñas de actuación
tecnolóxico-dixital en Madrid, no marco do Congreso Cidades
Intelixentes, deu a coñecer previamente (esta mesma semana e sen
saírmos do ámbito dixital) unha iniciativa que busca impulsar a
provincia en materia turística pola vía das novas ferramentas.
Estamos
a falar de TurisTIC, un proxecto que abrolla da rede de formación
e asesoramento SmartPEME, que se encadra no Plan Estratéxico de
Turismo da entidade que preside Carmela Silva, e que, en termos
concretos, porá en xogo recursos concretos para que as empresas se adapten ás
contornas dixitais de comunicación, promoción e xestión e poidan
subir novos chanzos en materia de competitividade.
TurisTIC
foi presentado pola presidenta da Deputación de Pontevedra, Carmela
Silva, acompañada dos deputados provinciais Santos Héctor e Javier
Dios, e das asesoras e asesores de SmartPEME en toda a provincia.
No
acto, Silva salientou que a provincia conta “con máis de 10.000
empresas dedicadas ao turismo o que representa, nin máis nin menos,
que o 34 % do sector en Galicia”. Isto tradúcese no seguinte: o
13 % das empresas da provincia pertencen ao sector turístico, “un
sector que xera moita actividade económica e emprego". Porén,
son firmas (na súa maioría) de menos de 10 persoas, con recursos
limitados, polo que non teñen a capacidade desexada para apostar de
cheo polas novas tecnoloxías. Aí entra en xogo, precisamente,
TurisTIC, sinalou Silva, cuxo obxectivo é “impulsar esta
formación, xa que as novas tecnoloxías están a mudar a cadea de
valor do sector; desde a comercialización ata o consumo son
diferentes xa que cada vez máis acudimos ás redes sociais, e
deixámonos influenciar á hora de seleccionar un destino, ou un
hotel, ou un restaurante, unha praia ou actividade”. E isto,
engadiu, “sen esquecer que cada vez máis mercamos billetes por
Internet, reservamos aloxamentos online e pedimos experiencias
personalizadas”.
TurisTIC
abrangue tres grandes liñas de actuación: capacitación TIC, un
centro de demostración e a aceleradora. A través da capacitación
preténdese achegar información e asesoramento personalizado ás
empresas en materia TIC nas oficinas de SmartPEME na provincia
(incluíndo unha diagnose inicial sobre o grao de madurez tecnolóxica
dos negocios e ofrecer produtos e solucións TIC personalizadas).
Ademais,
a iniciativa vai apoiar as campañas turísticas estacionais mediante
o emprego das TIC tendo en conta as festividades e eventos que teñen
lugar na provincia ao longo do ano. Para isto “apostará pola
formación e por un plan de mellora personalizado para cada empresa
que así o desexe”. Tamén no marco da liña de actuación de
capacitación TIC, organizarase unha xornada de turismo dixital,
prevista para outubro no Castelo de Soutomaior, na que se van mostrar
as novas tendencias, experiencias e vantaxes da aplicación das novas
ferramentas no sector turístico. Neste eido, a presidenta adiantou
que “está previsto que asistan á xornada responsábeis da empresa
Minube e tamén de Seggitur e faremos entrega do I Premio Anual ás
Mellores Iniciativas de Turismo Dixital”. Trátase dun galardón
que ten por obxectivos promover a innovación e a calidade no sector
recoñecendo diferentes categorías como a mellor idea de negocio, a
mellor transformación dixital, a mellor campaña de promoción
turística dixital e a mellor innovación tecnolóxica.
O
segundo dos eixos da iniciativa é o centro de demostración, que
pretende “servir de ponte e escaparate entre as empresas
tecnolóxicas e as de turismo, dando a coñecer solucións
tecnolóxicas e novas ferramentas TIC a través de demostracións e
exposicións”. Máis polo miúdo, o centro de demostración
centrarase en aspectos como a ciberseguridade, as aplicacións
móbiles, a información a gran escala ou os medios de pago, etc.
Pola súa banda, o terceiro dos eixos é a aceleradora, onde se van
titorizar os proxectos máis destacados, así como acelerar as
iniciativas emprendedoras innovadoras que desenvolvan tecnoloxías no
sector turístico.