A Deputación da Coruña fortalece a web que permite dar conta ao detalle das infraestruturas da provincia
venres, 22 de xuño do 2018
Imaxinemos
que desexamos saber cantos quilómetros de estradas ten o noso
concello ou, tamén, cantas vivendas e parques infantís. Pois cousas
como esta son as que permite a web da Enquisa de Infraestruturas e
Equipamentos Locais (EIEL) da Deputación da Coruña, unha ferramenta
posta en marcha da UDC co obxectivo de achegar unha “completa
radiografía” dos bens cos que contan os concellos da provincia. A
páxina, de utilidade para deseñar políticas e plans de obras e
investimentos por parte das administracións locais e provinciais,
vén de ser obxecto dunha importante remodelación que afectou de
cheo aos seus servizos: agora son máis e mellores. Por exemplo,
ofrécese un repertorio máis completo das infraestruturas e servizos
locais.
As
novidades foron dadas a coñecer onte polo presidente da Deputación,
Valentín González Formoso, o profesor da UDC Carlos Nárdiz e dos
técnicos do servizo provincial de Asistencia aos Concellos,
Francisco Freire e Pedro González. No acto, o titular da
entidade coruñesa dixo que a actualización (a sétima da enquisa
xa), cataloga un extenso inventario de máis de 4,5 millóns de
datos.
Segundo
se fixo saber, as innovacións presentadas onte, unidas ás
precedentes, permitiron facer accesíbel toda a información a
calquera cidadán a través da web EIEL. “Cun simple clic, unha
chea de datos como os equipamentos culturais, deportivos, sanitarios
e de lecer de cada municipio, a rede viaria, a subministración
eléctrica, a recollida de residuos e plantas de tratamento, o
abastecemento e saneamento de auga, as plantas de potabilización ou
as depuradoras, entre outros elementos, son accesíbeis ás
administración públicas e a calquera cidadán interesado”,
informaron os representantes da Deputación e da UDC.
No
plano de desenvolvemento técnico da EIEL, Carlos Nárdiz, Francisco
Freire e Pedro González mostraron varios exemplos prácticos de
datos recollidos na enquisa, como as distintas cualificacións do
solo e plans urbanísticos de cada núcleo, así como os sistemas de
saneamento e abastecemento de auga, que “inclúen un importante
volume de información como os tipos de captación, os puntos de
bombeo, lonxitude e diámetro da rede e anos de execución das
obras”. Asemade, salientaron “a gran complexidade da elaboración
da enquisa”, por mor sobre todo da importante dispersión
xeográfica. Porén, recalcaron que a Deputación foi “a primeira
de España en adaptar esta inxente base de datos a un sistema XIS de
información xeográfica”, que fai máis doado e intuitivo o acceso
á documentación, permitindo visualizar cada dato nun mapa. Asemade,
salientaron que a Deputación da Coruña tamén estivo entre as
primeiras institucións públicas en abrir unha web con datos
cartográficos para o uso público.