A Axencia SINC estrea novo deseño web
martes, 19 de xullo do 2011
A Axencia SINC, especializada en visualizar a
través de Internet o máis salientábel da investigación estatal en materia de
ciencia e tecnoloxía, vén de renovar a súa
faciana en liña. O redeseño da web, estreado oficialmente esta semana,
diríxese a facela aínda máis doada de empregar e, tamén, a acurtar o camiño que
leva directamente ao lector. En palabras dos responsábeis do Servizo de Información
e Novas Científicas, o obxectivo era facela máis “amigábel” para tódolos seus usuarios, xornalistas, institucións de
I+D e, por suposto, público en xeral interesado pola divulgación científica.
Dende o punto de vista das funcións da páxina,
dicir que seguen a ser as mesmas (quitarlle ferro á ciencia ao tempo que se
subliñan as súas vantaxes para a sociedade), só que redistribuídas para un
mellor uso.
Cómpre sinalar que a Axencia, a primeira das súas
características (pública, de acceso libre baixo licenza Creative Commons e
centrada exclusivamente no eido científico e tecnolóxico) no eido estatal,
achega de xeito continuo informacións en múltiples faces e formatos sobre un
variado número de cuestións: natureza, tecnoloxías, biomedicina e saúde, matemáticas,
física e química, humanidades e arte, ciencias sociais e política.
A nova web, que seguirá a emprestar especial
atención aos traballos de raizame española, fará fincapé en desenvolver e
impulsar un camiño aberto dende hai tempo: complementar a súa achega
comunicativa con múltiples feituras (textos, imaxes, vídeos) e afianzar as súas
conexións directas coas redes sociais.