Espíritu del Bosque participará no Festival Internacional de Cine Infantil de Chicago

A terceira longametraxe do estudio de animación Dygra Films, Espíritu del Bosque, vén de ser seleccionada polo Festival Internacional de Cine Infantil de Chicago para competir na súa sección oficial. O certame, que terá lugar entre os días 23 de outubro e 2 de novembro deste ano, celebra nesta edición o seu 25 aniversario.
Dygra Films levará a Chicago a vesión inglesa do seu último filme, que conta coas voces de actrices e actores de recoñecido prestixio como, Anjelica Huston, Ron Perlman, Sean Astin ou Giovanni Ribisi.
O pasado ano 2002, Dygra xa obtivera o Premio do Público neste mesmo certame con El Bosque Animado (a primeira longametraxe de animación 3D do estudio) e agora pretende repetir a experiencia con este filme, que se estreará o vindeiro día 5 de setembro no noso país.
Espíritu del Bosque é unha nova aventura dos personaxes de El Bosque Animado que terán que volver a protexer o monte da malvada Sra. D´Abondo.
O elenco de actores e actrices da versión española está encabezado por Luis Merlo, María Adánez, Juan Ibáñez e Damián Molla (estes dous últimos son os que interpretan ás “formigas” do programa de Pablo Motos, El Hormiguero).