nVIDIA Optimus permitirá optimizar a batería dos portátiles que inclúan 2 tarxetas gráficas

O equilibrio entre potencia e autonomía resulta sempre difícil de acadar, e nesta liña chega a tecnoloxía nVIDIA Optimus, que permitirá que os equipos portátiles que a utilicen alternen entre unha tarxeta gráfica integrada (de reducidas prestacións e baixo consumo) e unha dedicada (válida para xogos, contidos en Flash e vídeo en alta definición) de xeito automático, permitindo que os equipos compatibles poidan render ao máximo, consumindo o mínimo.
Na actualidade hai distintos equipos con varias tarxetas gráficas integradas, pero para conmutar entre ambas era preciso que o usuario elixise manualmente o modo de funcionamento preferido, mentres que con nVIDIA Optimus o propio sistema detecta as necesidades do software para elixir entre a tarxeta gráfica a utilizar.
Esta tecnoloxía é de software, e só será compatible con equipos bastante recentes que combinen unha serie de procesadores e tarxetas gráficas, aínda que é de agardar que nas vindeiras semanas comecen a chegar equipos que fagan uso de nVIDIA Optimus por defecto, coma os Asus UL50Vf, U30Jc, N61Jv, N71Jv e N82Jv.