iSEAS mobiliza tecnoloxías de observación e cálculo para rendibilizar o máximo a nosa pesca
luns, 11 de xaneiro do 2016
O proxecto
iSEAS, que se dirixe a impulsar escenarios de sustentabilidade
nas pesqueiras da Unión Europea, conta con ampla participación
galega entre os seus socios principais de proxecto. De feito, nas
súas fileiras, dándolle forma e facéndoo medrar, atopamos o
Instituto de Investigacións Mariñas (IIM-CSIC, con sede en Vigo), o
Centro Tecnolóxico do Mar (CETMAR), o Centro de Supercomputación de
Galicia (CESGA), a Universidade de Santiago (departamentos de
Economía Aplicada e de Enxeñaría Química), os Talleres Josmar de
Nigrán ou a organización OPROMAR (Marín), aos que se suma o
Instituto Español de Oceanografía, que tamén ten sen sede de seu
en Vigo. A alianza-consorcio iSEAS, cuxo principal coordinador e o
IIM-CSIC dende a nosa terra, encamíñase a sentar os alicerces dunha
contorna sustentábel (en termos de indicadores biolóxicos e
socio-económicos) nas áreas de pesca da Unión Europea. Isto,
sinalan os impulsores do proxecto, acadarase unindo as experiencias
tecnolóxicas, investigadoras e económicas dos integrantes do
consorcio.
Máis en detalle, conseguirase “mediante a
mellora da posta en práctica dos coñecementos existentes como de
solucións innovadoras para a redución e xestión dos descartes
pesqueiros”.
Para quen non o saiba, os descartes (en
palabras da FAO) son as capturas que constitúen a porción de
materia orgánica de orixe animal que se teñen que rexeitar durante
a actividade pesqueira mesma. Estes capturas desbotadas (e o xeito de
reducilas) son, a día de hoxe, un dos meirandes retos
medioambientais e produtivos aos que se enfronta a nosa pesca, tanto
no ecolóxico como tamén no económico (trátase de recursos
estragados, presentes e futuros). Cómpre lembrar que esta
problemática adquiriu unha nova dimensión o 1 de xaneiro do ano
pasado, ao entrar en vigor no ámbito da UE a nova política
pesqueira común que prohibe devolver ao mar os descartes, o que
segundo a Comisión Europea redundaría nunha información fiábel e
certeira sobre o que se apaña e de que xeito e, tamén, fomentaría
prácticas máis sustentábeis a bordo.
O proxecto LIFE iSEAS,
dado a coñecer en Vigo en xullo de 2014, xorde precisamente para dar
reposta a todo o devandito. Os seus principais vieiros de actividade
son os seguintes: optimizar o rendemento da pesca seleccionando as
áreas pesqueiras e a época durante a que a probabilidade de
descartes sexa máis baixa, mellorar con tecnoloxía as artes de
pesca e achegar opcións económicas viábeis.
O proxecto, que
conta cun orzamento de 3,8 millóns de euros, foi
presentado recentemente na feira de produtos mariños CONXEMAR,
onde os responsábeis do mesmo amosaron as súas previsións
tecnolóxicas e de servizo para cando remate iSEAS, en xuño de 2018.
Entre os recursos que deron a coñecer atopouse o sistema iObserver,
que é unha tecnoloxía que tería o cometido dun axente observador a
bordo dos barcos e que foi desenvolvido a para intervir o mínimo
posíbel no traballo dos mariñeiros. Ao mesmo tempo, fíxose saber
que iSEAS fornece unha ferramenta de predicións exactas baseadas en
modelos matemáticos que avalían a fondo as condicións
espazo-temporais das áreas de captura encamiñada (a ferramenta) a
achegar aos responsábeis da actividade pesqueira (armadores,
patróns) diferentes claves para un mellor e máis sustentábel
desenvolvemento do seu traballo. E todo en tempo real e co obxectivo
principal de permitir pesca máis selectiva.
Ademais, estase a
materializar un servizo piloto no porto de Marín, grazas á
cooperación e implicación activas de OPROMAR, organización
mariñeira con sede na vila pontevedresa, para impulsar medidas que
poñan en valor os descartes que se traian a porto. Sería, pois,
unha instalación “completamente operativa en terra” que se
empregaría para os procesos de valorización de especies desbotadas
e o seu comercio. Esta instalación, no marco do proxecto, denomínase
IDPV (Punto para o Procesado Integral e a Valorización dos
Descartes).
Volvendo ao sistema iObserver, un dos obxectivos
do proxecto é probar a súa eficiencia e funcionamento en buques de
investigación oceanográfica. Con este fin, impulsouse a instalación
dun conxunto de tecnoloxías estandarizadas capaces de realizar o
mesmo traballo que levan a cabo os observadores tradicionais
cualificados. O sistema dispón dunha cámara de vídeo que grava os
peixes capturados e calcula as especies e cantidades, cargándoos
nunha base de datos que é enviada ao servidor central que está nas
instalacións do CESGA.
O CESGA é socio tecnolóxico do
proxecto. Ademais de configurar e manter o software do iObserver e o
servidor onde se almacenan os datos do proxecto, crea o modelo de
datos e servizos xeoespaciais para a consulta da información
cumprindo estándares da UE, e desenvolve o xeoportal onde se
integra, visualiza e consulta toda a información de capturas do
proxecto, incluíndo o modelado de datos e as posíbeis valorizacións
por especies.