Zara amplía o seu negocio na Rede

Zara, a marca insigne da galega Inditex, que hai pouco descubriu de primeira man as vantaxes de empregar Internet para chegar a tódolos recunchos do mundo, vai ampliar a súa liña de negocio online a Dinamarca, Noruega, Suíza, Mónaco e Suecia, onde activará a súa tenda virtual a partir do vindeiro día 3 de marzo. Ata o de agora, a compañía téxtil galega estaba dispoñible en 11 países (Alemaña, Austria, Bélxica, España, Francia, Países Baixos, Irlanda, Italia, Luxemburgo, Portugal e o Reino Unido) e, a partir do mes que vén, estará presente de maneira virtual nun total de 16 estados. A firma anunciou a través dun comunicado que tamén ten como obxectivo, “penetrar no comercio electrónico de EEUU e Xapón ao longo deste ano”, onde considera que “existen grandes oportunidades de negocio”. Nestas tendas en liña o prezo das prendas é o mesmo que o que teñen nas tendas físicas, porén, o cliente ten a vantaxe de poder recibir as compras comodamente no seu domicilio por correo ordinario ou Express. A compañía tamén asegurou que a renovación da oferta na Rede “seguirá o ritmo que a das tendas físicas” e que as foras de pago seguirán a ser as habituais, as tarxetas de crédito e de débito.