YouTube Music e Premium superan os 50 millóns de subscritores
venres, 3 de setembro do 2021
Nos últimos
anos YouTube pasou de ser un servizo financiado unicamente mediante publicidade
a combinar servizos de reprodución musical e unha modalidade de pagamento sen
publicidade, e agora que unificaron estes servizos baixo o selo YouTube Premium
semella que atoparon unha fórmula con boa aceptación do público se atendemos ás
declaracións de Lyor Cohen, responsable da división de música de YouTube, quen
asegura que YouTube Music e Premium superaron os 50 millóns
de usuarios activos (entre subscritores e contas de proba).
YouTube leva preto de 6 anos tentando convencer aos usuarios en pagar polo seu
servizo, para o que ofrecen vantaxes como a descarga de contidos para a súa
reprodución fóra de liña, a posibilidade de reproducir contidos coa pantalla do
móbil apagada (algo práctico para, por exemplo, escoitar música) e incluso
eliminar a publicidade (especialmente molesta cando reproducimos os contidos no
televisor).
Cómpre detallar que os cartos das subscricións tamén se comparten cos creadores
de contidos na liña do que acontece coa publicidade, e precisamente a
combinación entre ingresos publicitarios e por subscrición é o que fai que YouTube
sexa actualmente unha das principais fontes de ingresos da industria musical, á
que achegou uns 4.000 millóns de dólares nos últimos 12 meses.
En calquera caso, resulta impresionante ver como ducias de millóns de usuarios
están dispostos a pagar por un servizo que poden gozar de balde simplemente por
recibir unha experiencia de uso lixeiramente mellorada, polo que entendemos que
os que pasan por caixa son os usuarios máis intensivos, que serÃan os máis
beneficiados polas vantaxes reservadas para subscritores de pagamento.