Yoigo denuncia as prácticas fraudulentas dalgunhas compañías para non perder clientes
luns, 2 de xullo do 2012
- Johan Andsjö, conselleiro delegado de Yoigo, denuncia os atrancos que poñen algúns operadores ante as portabilidades
O pasado 1 de xuño entraba en vigor unha normativa que
lle permitía aos clientes de telefonía móbil cambiar de operador sen perder o seu
número nun só día laborable, fronte aos catro días que facían falta ata a data
para realizar con éxito unha portabilidade.
Este trámite, que debería funcionar tecnicamente ben, vén
de motivar unha das últimas denuncias de Yoigo perante a Comisión do Mercado
das Telecomunicacións (CMT), ao advertir da existencia de “rexeitamentos falsos” por parte doutras
operadoras (sobre todo Orange e Movistar), que realizan estas prácticas
fraudulentas “para evitar perder clientes”,
aseguran.
Segundo informa o conselleiro delegado de Yoigo, Johan
Andsjö, este tipo de fórmulas para evitar que os clientes cambien de compañía, “aumentaron un 20% dende a entrada en vigor
da portabilidade nun día”, indica, e consisten basicamente en enganar ao
usuario advertindo dunha penalización que non existe; poñer problemas cos seus
datos mesmo cando son correctos, e outro
tipo de fórmulas que non serven máis que para dificultar o trámite.
É por iso que Yoigo pídelle “axuda” á Comisión do Mercado de Telecomunicacións (CMT), unha
entidade que Andsjö cualificou de “xusta,
profesional e funciona ben”.
- Exterior dunha tenda de Yoigo