Xuventude estrea un novo portal de información para os mozos
mércores, 6 de xuño do 2007
A Rede Galega de Información e Documentación Xuvenil
cambia a súa cara na Internet, de xeito que a web baixo o dominio rix.org pasaralle o relevo a xuventude.net na súa labor
informativa, segundo anunciou Rubén Cela, director xeral de Xuventude.
O novo portal pretende achegar máis información e busca a participación dos
mozos, no que é unha aposta para “mellorar
a calidade e a cantidade da información”, deixando de cinguirse só a cuestións
relacionados coa Dirección Xeral de Xuventude e incluíndo unha perspectiva
transversal de xeito que tamén se inclúen temas de sanidade, ensino emprego ou
vivenda pois “á mocidade aféctalle e preocúpanlle os temas que afectan e preocupan a
toda a sociedade”.
A actualización deste novo portal realízase en boa media grazas a “200 colaboradores estables” repartidos
por toda Galicia, mentres que os mozos interesados tamén poderán acceder a unha
quenda de correo dende a que recibir avisos sobre as novidades dos temas que
resulten do seu interese. Incluso poderán participar nun novo espazo chamado Exprésate! que
se converterá nunha galería virtual no que terán cabida todo tipo de expresións
artísticas.
Os mozos tamén poderán achegar consultas a través da nova web, que serán
respondidas en menos de 48 horas.