XoveTIC 2022 premia cinco novos e puxantes proxectos dos nosos novos investigadores
martes, 11 de outubro do 2022
A
semana pasada o
CITIC converteuse no gran referente galego e e estatal en materia de
novo talento investigador tecnolóxico. Foi grazas á celebración do
Congreso XoveTIC, que organizou o Centro de Investigación TIC da
UDC por quinto ano consecutivo, xuntando unha parte moi relevante do
persoal investigador mozo de España e Portugal que traballa no
ámbito das novas ferramentas. O resultado foi que máis de 50
proxectos de Intelixencia Artificial, análise da información a gran
escala (Big Data), computación de altas prestacións (High
Performing Computing), servizos e redes intelixentes e
ciberseguridade déronse a coñecer neste encontro, tanto en formato
de comunicación oral como póster.
O
obxectivo foi promover o “intercambio de experiencias e
coñecementos nun ambiente distendido, que fomenta a colaboración”,
segundo destacou o director do centro, Manuel F. González Penedo.
Nesta
edición, na que se retomou a presencialidade tras dous anos
celebrándose en liña debido á pandemia, tivo un especial
protagonismo a elevada participación de investigadoras e
investigadores da UDC, arredor dun 70 %, complementada con traballos
doutras universidades españolas, a de Alcalá de Henares e a de
Sevilla; e mesmo o carácter internacional, con presenza de proxectos
de universidades do norte de Portugal.
Premios
O
congreso XoveTIC recoñece anualmente, con axuda económica, os cinco
proxectos máis valorados polo comité científico en áreas ou liñas
de alto interese e impacto social. Este ano, os traballos premiados,
con atención á saúde de persoas discapacitadas e á educación
infantil, foron os seguintes:
-Low-cost,
scalable IoT technology for real-time streaming network auditing,
de Pedro Fernández-Arruti da UDC, entregado polo Clúster TIC de
Galicia, sobre tecnoloxía evolucionábel e adaptábel de baixo custo
para a auditoría de redes de transmisión en tempo real.
-Testing
and Analysis of Self-Sovereign Decentralized Digital Identity
Technology, de Pablo Santos da UDC, sobre análise de tecnoloxía
de identidade dixital, patrocinado polo CPEIG.
-Smart
bracelet for anxiety, de persoal investigador da Universidad de
Sevilla, encargado de presentar un modelo de pulseira intelixente
para a ansiedade.
-Assessment
of selective attention in children through Digital Teddy: preliminary
study, proxecto centrado en atención selectiva en nenos, de
Irene González Eiroa da UDC e patrocinado polas cátedras
institucionais vinculadas á Facultade de Informática da UDC.
-E,
por último, o proxecto sobre un robot asistente en procesos de
rehabilitación para persoas con discapacidade Assistant Robot for
Gait Rehabilitation in People with Disability, entregado pola
Fundación CITIC de Galicia a Manuel Lagos da UDC.
Colaboracións
O
encontro, orientado á busca de talento investigador novo no eido das
TIC, conta coa colaboración da Xunta de Galicia, a Facultade de
Informática da UDC, a Universidad de Oviedo, a Universidad
Politécnica de Madrid, a Universidade de Porto e AtlantTIC da
Universidade de Vigo. Os premios están financiados polo Colexio
Profesional de Enxeñaría en Informática de Galicia (CPEIG), o
Clúster TIC de Galicia, o Instituto Tecnolóxico de Galicia (ITG), a
Fundación CITIC de Galicia e as cátedras institucionais da
Facultade de Informática (Cátedra Aldaba WIB, Cátedra NTT Data en
Diversidade e Tecnoloxía, Cátedra R en Ciberseguridade e Cátedra
CICAS).