Xa podemos ver en Lingua.gal o vídeo-clip de A Banda da Loba en homenaxe a Xela Arias
luns, 8 de marzo do 2021
A
semana pasada lanzouse á Rede un novo e destacado audiovisual para
conmemorar a figura da escritora homenaxeada este ano no Día das
Letras Galegas, Xela Arias, que tería cumprido o día 5 deste mes 49
anos. Estamos a falar do vídeo clip Intempériome,
achegado pola formación feminina A Banda da Loba. O lanzamento vén
ademais co engadido extra de formar parte das celebracións galegas
do Día Internacional da Muller (este 8 de marzo). O
secretario xeral de Política Lingüística, Valentín García,
acompañou ás integrantes de A Banda da Loba na rolda de prensa de
presentación. O vídeo está
dispoñíbel no Portal da Lingua (Secretaría Xeral de Política
Lingüística). Xa superou as 3.500 reproducións en só tres
días de estar online.
O
tema musical pertence ao EP Hasme oír que prepara A Banda da
Loba en homenaxe á poeta sarriá no marco da programación
institucional das Letras Galegas 2021 dedicadas a Xela Arias.
Nas
vésperas da celebración do 8M e con motivo do 59º aniversario do
nacemento da escritora, a Biblioteca Pública de Santiago Ánxel
Casal de Sanatiago acolleu a rolda de prensa de presentación, na que
participou o secretario xeral de Política Lingüística, Valentín
García.
“Celebramos
unha autora intensa de vocación feminista, transgresora e pioneira,
tanto na estética como na poética, unha muller que de seguro se
sentiría identificada e correspondida no tributo destas cinco voces
talentosas e creativas que xa ocupan un lugar de seu no eido da
música máis actual cantada en lingua galega”, destacou Valentín.
No
acto participaron tamén as compoñentes da formación, Xiana Lastra,
Andrea Porto, Marcela Porto, Inés Mirás e Estela Rodríguez; Amparo
Castaño, Lois Arias e Darío Gil, nai, irmán e fillo da autora,
respectivamente; e o director da Biblioteca Ánxel Casal, Jesus
Torres.
A
peza Intempériome é o vídeo dunha canción que fala de
deixar atrás os prexuízos e os estereotipos e afondar na persoa que
queremos ser, con liberdade e respaldada pola rede dos afectos. Unha
idea que quixeron representar neste vídeo a través da evolución
dunha muller que, co que vai aprendendo co paso dos anos, adquire as
ferramentas necesarias para avanzar e coidarse a medida que se fai
máis vella.
Vídeo musical de A Banda da Loba