Xa hai cen mozos inscritos no novo plan formativo-tecnolóxico da Deputación de Lugo
mércores, 12 de xaneiro do 2022
A
Deputación de
Lugo fixo balance do seguimento que está a ter o seu programa
Reiníciate (enfoca o teu futuro), destinado a fomentar a
empregabilidade da xente nova botando man da formación nalgúns dos
nichos de mercado de meirande demanda presente e futura,
especialmente os tecnolóxicos. Segundo fixo saber a entidade
provincial, xa hai 100 inscritos neste programa, un novo plan de
emprego xuvenil impulsado pola Deputación de Lugo e a Escola de
Organización Industrial (EOI). O obxectivo é que “un total de 400
mozos e mozas da provincia poidan acceder a profesións de alta
demanda vinculadas coas novas tecnoloxías”. O programa arrancará
na penúltima semana de xaneiro coas cinco primeiras actividades de
formación gratuíta.
O
luns 17 de xaneiro darán comezo as formacións de Auxiliar de
xestión informática especializado en licitacións e subvencións
públicas, Xestión comercial e márketing e Márketing
dixital e redes sociais. Os tres cursos rematarán o vindeiro 14
de marzo. Algúns terán lugar en quendas de mañá e outros en
horario de tarde. O vindeiro 10 de febreiro comezarán os programas
Comunity manager e márketing dixital e Auxiliar de xestión
informática para pemes e asociacións, que rematarán o 7 de
marzo. Ambos cursos celebraranse de luns a venres, o primeiro en
horario de mañá e o segundo en quenda de tarde. Cada programa ten
unha capacidade de 15 persoas.
A
Deputación fixo saber que aínda restan 300 prazas por ocupar, que
poden solicitarse na web empleojovenlugo.es.
Para
calquera consulta ou dúbida, as persoas interesadas poden chamar ao
número de teléfono 982.26.02.04.
Promovido
pola institución provincial e a EOI, este plan de emprego conta cun
orzamento de 1.082.950€, achegados nun 85,9% pola Escola de
Organización Industrial a través do Fondo Social Europeo, que supón
930.254,05€. A Deputación de Lugo asume o 14,1% restante, o que
supón 152.695,95€. Un programa que dá continuidade ao Reiníciate:
dixitaliza a túa empresa, que tamén puxeron en marcha ambas
entidades e que, segundo fixeron saber, “está tendo moi boa
acollida entre as empresas da provincia”.
O
presidente José Tomé explicou que o obxectivo deste programa é dar
á mocidade “ferramentas de empregabilidade, ofrecendo para iso
información especializada, teórica e práctica, naqueles ámbitos
que hoxe en día máis se reclaman no mundo laboral”. Nese sentido,
Tomé detallou que “é unha formación que responde á necesidade
real de perfís profesionais que se están demandando, é dicir, os
que máis expectativas de inserción laboral teñen”.
Prácticas
remuneradas
Este
novo programa da Deputación e a EOI inclúe ata tres meses de
prácticas non laborais que serán remuneradas. O alumnado poderá
completar a súa formación tanto en empresas como en asociacións da
provincia cobrando uns 700€ ao mes durante este período.
Tomé
Roca puxo en valor que “grazas a este programa os participantes
mellorarán a súa capacidade e aptitudes para encontrar un traballo
e, ao mesmo tempo, as empresas e entidades da nosa provincia, coa
incorporación deste tipo de perfís profesionais, poderán mellorar
a súa actividade, ser máis eficientes, ter máis recursos para
optar a procesos de concorrencia pública e ser máis áxiles nos
seus procedementos administrativos e no mundo dixital”.
E
engadiu: “A previsión coa que traballamos é que a inserción
laboral deste programa sexa, polo menos, dun 25% dos participantes”.
É dicir, que uns 100 mozos e mozas consigan un emprego ao rematar
este programa. “Esta”, engadiu, “é unha previsión, pero oxalá
poidamos superar esa porcentaxe”.
Tomé
recalcou que, sobre todo, este proxecto “é unha medida de apoio ao
rural para que os mozos e mozas da provincia de Lugo poidan labrar o
seu futuro no lugar onde viven atopando un posto de traballo no seu
concello ou na súa comarca”.