Xa está na Rede todo o relativo ao festival Lugomáxico 2017
mércores, 26 de abril do 2017
Xa
está dispoñíbel na Rede toda a información sobre o festival
lucense de maxia, Lugomáxico, que se celebra a vindeira semana entre
o día 1 de maio e o sábado 6. Boa parte dos recursos podemos velos
en lugomaxico.es, unha páxina
que salienta pola súa vertente informativa (achéganos todo o
referente ao certame coas localizacións e horarios de cada actuación
e cos datos de cada artista participante) e pola súa vertente
estética (moi visual e moi centrada en levarnos sen atrancos ao
miolo informativo). A páxina compleméntase cos recursos achegados
dende lugo.gal, o sitio en liña do
Concello, e dende entradaslugo.es,
o portal para a venda de billetes do Concello no que está habilitada
a billeteira virtual para facernos cos nosos pases.
Para
quen non o saiba, LugoMáxico chega estes días á súa edición
número 14. Incluirá un bo número de actividades para cada xornada,
a desenvolver en diferentes emprazamentos, e máis tres importantes
galas. Inaugúrase o luns día 1 ás 18.00 horas cunha sesión
gratuíta de maxia na Praza Maior, perante o consistorio, onde a
Compañía Civic Civiac presentará o espectáculo O Gran Zampano.
O certame tamén contará coa presenza, o venres, do hipnotizador
Jeff Toussaint, coñecido polas súas participacións en El
Hormiguero e no programa 1,2,3 Hipnotízame de Antena3.
Ademais,
o sábado día 6 ás 21:00 horas no Auditorio Municipal Gustavo
Freire celebrarase a Gran Gala Internacional Lugomáxico 2017 onde
participarán, en palabras da organización, “unha escolma dos
mellores meigos do mundo presentados polo arxentino Maximliano Stya”.