Xa está na Rede todo o relativo á novena edición dos Premios EGANET, que xa abriron o prazo de presentación
luns, 10 de decembro do 2012
Os Premios EGANET 2012, novena
edición, comezan a facer ruído na Rede. Segundo avanzou os días
pasados a asociación empresarial galega, xa
está aberto o prazo para presentarmos
candidaturas ás diferentes categorías
(cinco), estando previsto o peche do prazo para o día 9 de xaneiro.
O obxectivo de EGANET, salientar o labor dos nosos profesionais e
empresas TIC, vén este ano redobrado. Cousa natural, se temos en
conta que a crise produtiva aperta e que
todo semella pórse en contra do investimento en innovación. Pero as
empresas e profesionais galegos seguen adiante co espallamento
dixital, malia o panorama, sinalan dende EGANET, que xa ten toda a
información dispoñíbel sobre o certame na
web de seu.
Empresas, profesionais, asociacións, organización
empresariais, ONGs, entes públicos e calquera outro organismo con
sede social en Galicia poderán presentar as súas candidaturas aos
premios, “sempre e cando realicen proxectos no eido
das tecnoloxías da información e as comunicacións”,
sinálanse nas bases. De non ter razón social en Galicia, os/as
candidatos/as poderán participar se teñen relación clara coa
cultura, lingua ou sociedade galegas.
As categorías dos
premios son cinco, ás que se engade o Premio Especial EGANET,
que a Asociación outorga ao proxecto, entidade ou personalidade
galega que desde a última edición dos galardóns máis se esforzase
en dar a coñecer e impulsar a realidade galega no contorno Internet
e, deste xeito, “contribuíse a promocionar as novas tecnoloxías
en Galicia”. Para esta modalidade non se recibirán
candidaturas e serán as empresas socias da asociación as que elixan
directamente ao premiado ou premiada.
As cinco categorías para as que se reciben
candidaturas son as seguintes: Premio Mellor Proxecto Colaborativo
Empresarial TIC; Premio Mellor proxecto Emprendedor TIC; Premio
Mellor Aplicación Software; Premio Mellor Comunicación Dixital e
Premio Mellor Negocio Online.
O uso de código aberto, a capacidade innovadora, a
adecuación dos proxectos aos distintos soportes móbiles e o acceso
universal ás novas tecnoloxías serán méritos que se recoñecerán
de maneira transversal, independentemente da categoría á que se
presente cada proxecto.
Os Premios EGANET acumulan nas 9 edicións a 1.303
proxectos presentados por máis de 600 empresas.