Xa está na Rede o meirande mapa do Universo e en tres dimensións
venres, 10 de agosto do 2012
O
Instituto
de Astrofísica de Canarias (IAC) participa nun proxecto, xunto con
entidades de todo o mundo especializadas no estudo do firmamento,
para acadar e publicar a maior fotografía do ceo nocturno ao alcance da man de
internautas e investigadores.
A imaxe resultante, primeiro con feitura tradicional e agora en formato de tres dimensións, constitúe a primeira pedra dun catálogo que
non aforrará detalles. Para comezar, podemos albiscar no mapa presentado buracos negros ou galaxias (200 millóns), das cales 540.000 aínda non foran estudadas. O mapa en cuestión está
accesíbel na Internet para as xeracións vindeiras, cousa moi a ter
en conta nuns tempos, os que vivimos, en que cada vez é máis
difícil observar as estrelas, por mor do exceso de
luz nas cidades (as estrelas, literalmente, están a ser roubadas polos focos dos campos de fútbol, as obras en construción, os parques ou as
rúas baleiras nas que non se precisan ducias de farois).
A
achega, como dixemos, é froito dunha alianza internacional de
entidades que se coñece como a Sloan
Digital Sky Survey III. Trátase
do xermolo dun catálogo cartográfico que fornecerá datos
salientábeis de grandes cuestións que seguen a xerar controversia,
como por exemplo a materia escura. Para ir abrindo boca, podemos
ver xa na Rede un vídeo no que se amosa un itinerario virtual polo
Universo e
máis concretamente polas contornas esculcadas ao abeiro do proxecto
SDSS nos primeiros dous anos de actividade deste proxecto. O vídeo
en cuestión, unha animación froito dun inxente traballo de escolma
de datos, expón preto de 400.000 galaxias. O obxectivo, a medida que
o proxecto SDSS medre, é deixar
o menos posíbel, como
dixemos, por rexistrar.
Segundo
explica o investigador da Universidade de La Laguna, Ismael Pérez, a
nova información, baseada en espectros obtidos co telescopio Sloan,
permitiu deseñar a peza en 3D que agora se está a presentar. “O
mapa en 3D”, sinala,
“é a peza clave da
novena publicación de datos que leva a cabo a alianza
internacional”. Esta
publicación está dispoñíbel nas páxinas do proxecto
SDSS e Skyserver.