Wifitech ofrece fibra e fixo por dende 20,95 euros/mes

O ano pasado sorprendeunos o operador Xenet coa súa oferta de fibra e fixo por só 17,90 euros/mes, tarifa que actualmente custa 21,90 euros/mes, pero que ten como meirande limitación que só está dispoñible en zonas con cobertura de MásMóvil, de aí que chame poderosamente a atención a oferta que lanza Wifitech, compañía que ofrece fibra simétrica de 300 Mbps e teléfono fixo (con chamadas ilimitadas a fixos e 60 minutos a móbiles) por 20,95 euros/mes baixo a cobertura de fibra de MásMóvil, ou por 23,95 euros/mes baixo cobertura de fibra de Movistar, combinación coa que din chegar ao 98% do territorio nacional.
Esta nova tarifa ten 12 meses de permanencia, xa que inclúe instalación e router, e pode completarse con liñas móbiles, aínda que con esta compañía parece máis recomendable contratar o móbil aparte, xa que conta con moitas opcións, destacando o operador co que queremos ter cobertura (como exemplo destas tarifas temos móbil con chamadas ilimitadas e 20 GB de datos con cobertura de Movistar por 9,95 euros/mes, mentres que con cobertura tripla pode contratarse unha liña con chamadas ilimitadas e 15 GB de datos por 5,95 euros/mes).