Vueling renova a súa web con novas funcionalidades
xoves, 6 de novembro do 2008
Vueling, a compañía de baixo custo española,
vén de estrear unha nova versión do seu sitio web, que introduce notables
melloras respecto do deseño anterior e simplifica a procura de servizos
dándolles máis visibilidade ás últimas promocións de prezos lanzadas pola
empresa.
Deste xeito, os
clientes da liña aérea que se conecten á páxina web oficial, accederán á
información que lles interese de maneira moito máis doada e poderán mercar os
billetes máis comodamente.
Con esta mellora,
Vueling agarda incrementar o seu “nivel
de conversión”, é dicir, aumentar o número de clientes que, unha vez que
acceden á web, rematen “consumando o
proceso de compra”.
O cambio máis
obvio do novo sitio web de Vueling, prodúcese na súa aparencia, que conta cun
deseño “máis lóxico” e cunha maneira
máis cómoda de acceder aos diferentes segmentos de compra en liña: venda directa individual, a grupos, a
axencias e a empresas. Estas catro canles representan hoxe máis do 75 por
cento das vendas da firma.
Asemade, a
remodelación contén menos ligazóns polo é máis doado navegar por el e atopar
mellor as ofertas de voos atractivas para os nosos petos.
A web tamén
destaca agora por permitir facer reservas de voos e hoteis á vez e por
incorporar un novo criterio de procura na cal o pasaxeiro pode especificar a
franxa de datas nas que está interesado.
Novidades nas reservas de grupos
As melloras na
páxina contemplan tamén as reservas para grupos de entre 10 e 180 persoas, que
teñen un apartado especial na web. A partires de agora, os que estean
tramitando un grupo coa aeroliña, poderán solicitar en liña, cambios na reserva
de xeito rápido, con claves de usuarios para poder xestionar as modificacións
que precisen.
Asemade, a web
ofrece a opción de solicitar unha oferta para un grupo informando de antemán o
presuposto de que dispón por pasaxeiro; deste xeito, a aeroliña de baixo custe
intentará, segundo anunciaron os seus responsables, “adaptarse ás posibilidades dos interesados, orientando os horarios,
días e divisións de grupo en función do presuposto do que dispoñan cada un”.
Vueling.com tamén
está dispoñible a través de teléfonos móbiles e PDA´s na dirección
m.vueling.com, e nos idiomas: castelán, catalán, inglés, francés, italiano,
holandés, portugués, éuscaro e galego.