Volve o 21 de abril a feira das mulleres científicas e tecnólogas da UVigo
venres, 14 de abril do 2023
A
Unidade de Cultura Científica vai celebrar este 21 de abril na praza
de Berbés (Vigo) un evento destinado a combater a fenda de xénero
no ámbito da investigación, reivindicando as importantes
contribucións femininas á totalidade das ramas do coñecemento máis
avanzado. Desenvolverase baixo o epígrafe A ciencia que vén ten
nome de muller, e terá formato de expo-feira. Trátase da 2ª
edición dun evento que na anterior convocatoria foi un éxito de
participación (con 400 asistentes). A feira, que tamén terá
actividades no edifico Redeiros e no planetario do Instituto Marítimo
Pesqueiro, contará coa participación do persoal investigador do
centro atlanTTic (UVigo). De feito, da ducia de postos que acollerá
o recinto do Berbés, dous contarán coa presencia de persoal
investigador de atlanTTic, onde poderán achegar á cidadanía algúns
dos seus proxectos.
Na
presentación da expo-feira, celebrada este xoves 13 no edificio
Redeiras, as vicerreitoras Belén Rubio e Mónica Valderrama
incidiron no carácter lúdico da iniciativa, coa que a UVigo
pretende seguir achegando a ciencia á sociedade dun xeito accesíbel
e divertido. Ambas destacaron o impacto que accións como a
expo-feira A ciencia que vén ten nome de muller teñen no
grao de coñecemento que a sociedade ten a Universidade de Vigo.
“Estes labores de difusión levan anos e esta feira celebrará a
semana que vén a súa segunda edición, moi centrada no papel da
muller na ciencia que é moi importante. Pero esta é unha carreira
moi longa”, dixo Rubio, que destacou a importancia de traballar
coas nenas desde que son pequenas para fomentar a vocacións
científicas, amosándolles referentes, a través de iniciativas como
as charlas que investigadoras da UVigo imparten en centros de
primaria e secundaria de toda Galicia.
De
Galicia ao espazo; Realidade virtual e realidade aumentada
ou A importancia das algas microscópicas mariñas son os
títulos dalgúns dos obradoiros que entre as 16 e as 19.30 horas
desenvolveranse na praza do Berbés, que ademais contra o mediodía
recibirá a visita de escolares e 5º e 6º de primaria dun centro
educativo da contorna.
Deste
xeito, tanto o alumnado, como o público que pola tarde visite a
expo-feira poderá somerxese, da man das e dos investigadores da
UVigo, a través de obradoiros e experimentos en ámbitos como o
medio ambiente, a saúde, a tecnoloxía ou o patrimonio, as liñas
temáticas desta edición do evento.
As
actividades de A ciencia que vén ten nome de muller
completaranse coa conferencia que a partir das 19.15 horas impartirá
a investigadora en evolución do cancro do Cinbio da UVigo, Nair
Varela Rouco, que fará un percorrido por historias de mulleres
relevantes no eido da investigación. Pola súa banda, o Instituto
Marítimo Pesqueiro organizará, a partir das 16.00 horas, unha
visita ao planetario, guiada polo capitán da Mariña Mercante Adolfo
García Campos. Esta actividade ten un aforo limitado a 40 persoas,
polo cómpre que os interesados realicen unha reserva.
A
expo-feira insírese no programa de actividades 2022-2023 de Ciencia
de ida e volta, o plan anual da Unidade Cultura Científica
(UCC) da UVigo, que conta cun orzamento de 128.000 euros sufragado
con fondos propios e cunha achega da FECYT de 11.000 euros, o que
supón un incremento do 29% con respecto ao orzamento de 2021/2022.
Formación para o PDI ou as actividades desenvolvidas o 11F co gallo
do Día Internacional da Muller e a Nena e a Ciencia, son algunhas
das accións que xa se levaron a cabo este curso ao abeiro do
programa Ciencia de ida e volta.