Voluntariado Dixital amosa o seu traballo perante Castela e León
venres, 5 de decembro do 2014
Este venres celébrase
en todo o mundo o traballo desinteresado polos demais. Falamos do Día
Internacional dos Voluntarios, unha importante conmemoración que na
nosa terra tamén está a deixar pegada. E, en boa medida, unha
pegada dixital. Entre as entidades que están a celebrar a xornada
atópase a Axencia para a Modernización Tecnolóxica de Galicia,
AMTEGA, que participa nunha xornada en liña de voluntariado
tecnolóxico xunto coa Dirección Xeral de Xuventude e os
responsábeis do Programa de Voluntariado Tecnolóxico da Xunta de
Castela e León. AMTEGA amosa na cita os detalles da iniciativa
tecnolóxico-solidaria de seu, o
programa de Voluntariado Dixital. Os detalles debullaranse a
través da experiencia dun dos 400 e-voluntarios adheridos ao
programa. Segundo informa a Axencia, da iniciativa xa se beneficiaron
máis de 3.800 persoas en Galicia.
José Luís Varela,
administrador de sistemas informáticos será, precisamente, o
voluntario do programa que compartirá a súa experiencia en
actividades de alfabetización dixital para persoas maiores na
Asociación Sociocultural Os Tilos e a través do proxecto Santa
Comba na Memoria. Trátase dunha web para o recordo e un repaso á
historia do século XX do concello, accesible no enderezo
santacombanamemoria.es.
A través de máis de 5.000 fotografías, Santa Comba na Memoria
abre unha xanela ao pasado de Santa Comba desde o ano 1900 e reúne
nun mesmo espazo os retrincos de historia gardados en papel durante
un século nos fogares dos veciños.
Voluntariado Dixital é
unha iniciativa posta en marcha en febreiro de 2012 que conta xa con
máis de 400 persoas voluntarias e formáronse máis de 3.800 persoas
a través dos apoios dixitais que se prestan. Ten como obxectivo
achegar as novas tecnoloxías a unha maior porcentaxe de poboación,
favorecendo a inclusión dixital de toda a cidadanía, especialmente
entre os colectivos de persoas maiores e de persoas con
discapacidade. “Este último trimestre”, sinala AMTEGA,
“leváronse a cabo 8 apoios dixitais grazas á participación de 6
voluntarios e, ata o momento son xa 70 as Entidades de Acción
Voluntaria que colaboran co Programa de Voluntariado Dixital para
promover accións de alfabetización dixital que faciliten a
e-inclusión da nosa sociedade e diminúan a fenda dixital”.
No Día Internacional
dos Voluntarios (DIV) 2014, ademais de celebrar o voluntariado en
todas as súas vertentes, réndese especial tributo á participación
das persoas que contribúen ao cambio a nivel local, nacional e
global, poñendo especial atención á contribución dos voluntarios
que involucran ás persoas desde os alicerces no proceso de toma de
decisións, para finalmente crear un espazo de participación, que
leva a gobernos máis fortes, á cohesión social, á paz e ao
desenvolvemento sustentábel.