Vodafone prolonga a súa aposta polo turismo accesíbel
venres, 15 de novembro do 2013
Xa sabiamos do compromiso
que comparten PREDIF (Plataforma Representativa Estatal de
Discapacitados Físicos) e a operadora Vodafone no camiño de
fomentar experiencias de viaxes e coñecemento de outros lugares a
medida de todo tipo de colectivos con diversidades funcionais e
motrices. Sabiamos deste compromiso entre outras cousas porque
foi amosado en detalle en Compostela. Do que non tiñamos
constancia era de que ía ter continuidade no tempo a través de
actividades futuras que sigan a liberar monumentos, paraxes naturais,
establecementos ou restaurantes de todo tipo de atrancos físicos.
Francisco Sardón Peláez, presidente da Plataforma, e Santiago
Moreno, director xeral da Fundación Vodafone, deron
a coñecer esta semana a prolongación do acordo. Realizarase
entre outras cousas unha guía sobre rutas enolóxicas accesíbeis
que se publicará na
web específica de PREDIF e na
aplicación móbil Tur4all.
O convenio comprende
tamén a presenza de ambas as entidades nas principais feiras do
sector que se celebran no Estado para ofrecer información aos
visitantes sobre a oferta turística sen barreiras. Por outra banda
traballarase para concienciar ás empresas deste eido produtivo da
importancia da accesibilidade universal e o deseño para todos á
hora de xerar unha completa oferta de lecer.
Asemade, realizarase a
devandita guía, con información das rutas do viño da xeografía
estatal e da súa oferta turística complementaria que reúnan un
nivel óptimo de accesibilidade para persoas con diversidades
funcionais. “Incluirá unha descrición detallada sobre o nivel de
accesibilidade física, visual e auditiva das diferentes estancias e
servizos que ofrecen, así como unha breve información sobre a súa
localización e contorna”, informaron Sardón e Moreno. Esta nova
guía complementará outras iniciativas postas en marcha por ámbalas
entidades como as guías de turismo accesíbel publicadas en anos
anteriores.
Para o director xeral de
Fundación Vodafone España, este acordo vén a “remarcar un
esforzo continuado entre ambas as entidades, onde aprendemos o que as
novas tecnoloxías achegan ao lecer sen barreiras en España”. A
guía, dixo, “será unha ferramenta eficaz que reflectirá os
valores turísticos do país e contribuirá a atraer xente doutros
países”.