Vodafone ofrecerá aos seus clientes os contidos de música en streaming de Napster
luns, 21 de outubro do 2013
Vodafone España e
Napster anunciaron os días pasados un
acordo de colaboración para ofrecer todos os contidos do servizo de
música en streaming aos seus clientes en múltiples
dispositivos, e todo, informan, coa calidade da rede 4G e 3G da
operadora e con ofertas exclusivas materializadas a través de dous
servizos específicos. Por unha banda Napster Unlimited,
achega multidispositivo que permite o acceso ao catálogo completo de
cancións de Napster por 7 euros ao mes (o primeiro mes de balde), e
pola outra Napster Lixeiro, que permite aos clientes gozar de
sesenta streams no seu teléfono intelixente por dous euros ao
meses durante un período de medio ano.
Segundo informan as dúas
empresas, o primeiro servizo xa está dispoñíbel en exclusiva para
calquera cliente de Vodafone España (fornecendo acceso ao catálogo
musical sen escoitar publicidade) e Napster Lixeiro estarao
nas vindeiras semanas. En total, estamos a falar dun catálogo de
máis de 20 de millóns de cancións a nivel mundial: o catálogo de
Napster en streaming, accesíbel como aplicación (con ou sen
conexión de datos) para os principais smartphones e tablets
nas plataformas IOS e Android (tamén se pode acceder desde o PC ou
Mac). As achegas desta empresa permiten, ademais, crear listaxes e
compartilas cos contactos, escoitar emisoras de radio e, a maiores,
sincronízase de maneira automática entre todos os dispositivos do
usuario. Tamén pode utilizarse a través de conexión Wi-Fi.
Thorsten Schliesche,
vicepresidente en Europa de Napster, comentou ao fío do acordo con
Vodafone: “Sabemos que os seareiros da música en España están
estreitamente ligados ao mundo dixital, confirmando a España como
líder en Europa na adopción de teléfonos intelixentes; neste senso
a cooperación con Vodafone é unha oportunidade inmellorábel de ter
un acceso fácil e ilimitado ao noso servizo premium de música
en streaming, en calquera intre e en calquera lugar”. Con
estas achegas, engadiu, “ofrecemos aos amantes da música unha
maneira excelente de descubrir e estar ao día coas tendencias
musicais máis populares”.
Branca Echániz,
directora de Servizos de Consumo da Unidade de Negocio de
Particulares de Vodafone España, comentou: “En Vodafone sempre
apostamos por ofrecer o mellor servizo e os mellores contidos aos
nosos clientes, sendo a música un dos contidos máis apreciados, e
de aí a nosa alianza con Napster”.