Vodafone mellora a calidade das chamadas coa tecnoloxía Voz HD
xoves, 16 de outubro do 2014
Vodafone anunciou este
mércores a
actualización integral da súa rede 3G e HSPA+ en toda España coa
tecnoloxía de voz en alta definición (Voz HD). Esta
incorporación, sinala a operadora, posibilitará chamadas “máis
nidias e claras”, minimizándose o son de fondo e sen que sexa
preciso trocarmos de terminal. En definitiva, a actualización pon en
xogo “un son máis natural” e “un mellor recoñecemento da voz
no transcurso das chamadas”. O despregue levouse a cabo en
colaboración con Huawei e Ericsson.
Voz HD, engade a
compañía, pode gozarse en máis de 130 terminais compatíbeis,
entre os que Vodafone salienta os seguintes: iPhone 6 e iPhone 6
Plus, Samsung Galaxy S4 e S5, LG G3, Nokia Lumia 635, BlackBerry Z
10, Smart 4 Power, Smart 4 Turbo ou os fixos de sobremesa Neo 4000. A
previsión é que a esta tecnoloxía se vaia estendendo de xeito
progresivo ao resto do catálogo da compañía e sen ningún custe
para os clientes.
Sinalar tamén que
acompañando esta novidade, Vodadfone está a levar a cabo diferentes
probas en varios puntos da xeografía estatal coa tecnoloxía de Voz
sobre LTE (VoLTE), que nos vai permitir facer chamadas de voz en Alta
Definición (HD Voice) sobre a rede 4G con tempos de establecemento
inferiores a un segundo. Isto, explica Vodafone, “abre a porta a
servizos avanzados e interoperábeis que facilitan a comunicación
multimedia e a colaboración ao mesmo tempo que se realiza a chamada
de voz”. Esta tecnoloxía estará dispoñíbel comercialmente nos
vindeiros meses.