Vodafone levará Internet aos centros culturais municipais de Ponte Caldelas
venres, 23 de outubro do 2015
- Casa consistorial do concello pontevedrés de Castro Caldelas/ Imaxe da Galipedia
O Concello
pontevedrés de Ponte Caldelas vai poder aforrar até o 50% do seu
gasto telefónico actual tras un acordo asinado coa operadora
Vodafone destinado, entre outras cousas, a acometer a renovación
de tódolos terminais telefónicos xestionados pola administración
local. Asemade, o contrato diríxese a equipar con Internet
(tecnoloxías 4G e 3G) os centros culturais do termo municipal. Nesta
liña de fornecer cobertura aos espazos de reunión e actividades da
veciñanza, o contrato asinado entre o Goberno local e a compañía
de telecomunicacións permitirá que o Centro Sociocultural de
Forzáns dispoña de “conexión ao ciberespazo despois de máis de
catro anos desta solicitude veciñal”, informaron fontes do
Concello.
O contrato, que obrigará
a unha permanencia con esta compañía telefónica de dous anos,
permitirá aplicar un sistema de tarifado “moito máis económico
có actual”, sinala o Goberno local, que engade que tamén se
mellorará “o servizo con novos terminais que anovarán por
completo a tecnoloxía dispoñíbel até o de agora no Concello”. O
alcalde Andrés Díaz amosou a súa satisfacción polo acadado na
sinatura con Vodafone, máis que nada por o contrato dá solución
“aos problemas que padecían varios centros culturais municipais no
rural do concello que, a partir de agora, poderán dispoñer de
internet, ferramenta imprescindíbel e que é cada vez máis
demandada tanto por mozos como por usuarios de tódalas idades”. No
que se refire ao aforro, sinalou que este “permitiralle á
Administración local dispoñer de meirande operatividade económica
para poder adicala a atender demandas veciñais para mellora-la
calidade de vida dos nosos veciños e veciñas”.