Vodafone lanza CarConnect, a súa tecnoloxía IoT para sermos mellores condutores
mércores, 6 de abril do 2022
CarConnect,
a solución IoT (siglas de Internet das Cousas) para o coche
conectado de Vodafone, está xa á venda para clientes e non clientes
da operadora, dende este mércores 6 de abril. A tecnoloxía, segundo
explica a compañía de telecomunicacións, baséase nun dispositivo
cunha Vodafone Smart SIM integrada con datos que proporciona Wi-Fi de
alta calidade a través da súa conexión 4G. Así, informa da
localización GPS e o estado do vehículo, envía alertas a través
de mensaxes e chamadas automáticas, e ofrece ofertas personalizadas
como descontos en gasolineiras e restaurantes. “Todo se controla
desde o móbil a través da aplicación CarConnect”, sinala
Vodafone.
A
solución non require instalación, o cliente só ten que conectalo
ao porto OBD do coche (conector que teñen todos os vehículos
fabricados de 2003 en diante).
Como
dixemos, o
dispositivo leva asociado a aplicación móbil CarConnect, desde a
que se xestionan e controlan todas as súas funcionalidades. A
través desta app, teremos á nosa disposición toda a
información sobre o vehículo (localización exacta, dispositivos
conectados á rede Wi-Fi, etc.) e “indicadores moi interesantes que
axudarán a mellorar a información da viaxe e a súa seguridade”,
sinala Vodafone, salientando tamén as facilidades que se poñen en
xogo para coñecermos a previsión do tempo detallada por horas e
días e as posibilidades dun sistema de puntuación da condución
(DriveScoring) que nos axudará a mellorar as nosas habilidades e
destrezas ao volante, “asignando unha puntuación por viaxe baseada
en parámetros medíbeis, tales como aceleracións-deceleracións
bruscas, xiros inesperados ou o tempo que se conduce superando a
velocidade límite”. Así mesmo, pode valorar como é a nosa
condución e onde debe mellorar, e terá dispoñíbel o histórico de
puntuación do último mes, para que poidamos comparar. Por outra
banda, tamén teremos coñecemento exacto sobre a localización do
noso vehículo en cada intre e sobre os mellores xeitos de planificar
unha ruta, amais de facilidades para atopar o parking público
que máis nos conveña, ter acceso á lista de viaxes realizadas polo
vehículo e acceder ao detalle de cada un deles.
Por
último, inclúe a funcionalidade CarConnect Alarm Assistant, un
sistema seguro de notificación de alertas mediante o cal se informa
ao cliente a través dun aviso ao móbil de calquera anomalía no
vehículo e, en caso de non haber confirmación de lectura,
envíaselle un SMS e realiza unha chamada automática tanto a el como
aos contactos de confianza que definise.