Vodafone inicia o despregamento de routers con tecnoloxía Wi-Fi 6
venres, 9 de outubro do 2020
Vodafone
España comezou o despegue dos seus novos routers con
tecnoloxía Wi-Fi 6, que, segundo apuntou a operadora, permitirán
aos usuarios converxentes gozar “en primicia” dunha tecnoloxía
que achega velocidades até catro veces maiores cás actuais e que
incrementa até en 3 veces a duración da batería dos dispositivos
conectados. Estes routers comezarán a chegar aos clientes da
compañía ao longo das vindeiras semanas.
O
router Vodafone Wi-Fi 6 Station foi certificado pola Wi-Fi
Alliance para ofrecer esta tecnoloxía nos dispositivos compatíbeis
con ela, algúns dos que xa comercializa Vodafone. Amais das ditas
vantaxes, estes routers poden achegar conexión a 120
dispositivos de xeito simultáneo, e “sen perder a calidade no
sinal Wi-Fi”, engade Vodafone, que pon o foco no carácter
sustentábel destas tecnoloxías, que xa que son quen de incrementar
até en tres 3 veces a duración da batería dos aparellos
conectados, “reducindo tamén as interferencias en contornas
conxestionadas”. Este, explica a operadora, é o primeiro chimpo no
espallamento dun novo estándar que pretende mellorar de maneira
significativa a experiencia dos usuarios cando están ligados á rede
sen fíos dos seus domicilios e navegan por Internet ou visualizan
audiovisuais en streaming.
Por
certo que Wi-Fi 6 tamén permitirá reducir ao mínimo a latencia, o
que resulta especialmente útil en aplicacións de xogo online
ou de xogos na nube.
Arestora
a compañía de telecomunicacións dispón no seu catálogo de máis
de 20 dispositivos (smartphones e tabletas) que soportan esta
tecnoloxía e que poden aproveitar as capacidades que achega.
Estímase que, a partir de 2022, o seu uso será masivo nos novos
dispositivos que se comercialicen (smartphones, tabletas,
portátiles, Smart TV, etc.).