Vodafone duplica a cobertura 5G nos municipios costeiros de Galicia este verán

Muros é unha das vilas beneficiadas destes traballos de Vodafone

Vodafone informou dun importante reforzo na súa rede 5G nas zonas costeiras de Galicia. O obxectivo dos traballos foi “ofrecer a mellor experiencia, conectividade e velocidade de acceso a Internet aos seus clientes durante a tempada estival”. En concreto, duplicou a súa cobertura de rede 5G en 19 municipios costeiros galegos para mellorar a cobertura e a capacidade da súa rede 5G ante o estimado incremento do tráfico no verán.
Os municipios costeiros que poderán gozar desta mellora na conectividade 5G de Vodafone son: A Coruña, A Pobra do Caramiñal, Barreiros, Boiro, Ferrol, Foz, Marín, Miño, Muros, Nigrán, Noia, O Grove, Oleiros, Pontevedra, Sanxenxo, Soutomaior, Vigo, Vilaboa e Vilanova de Arousa.
Despregadura 5G de Vodafone en Galicia
Este reforzo forma parte da despregadura de rede 5G na frecuencia de 700MHz que Vodafone ten previsto chegar a 138 municipios galegos e a máis de 2,2 millóns de habitantes na nosa xeografía durante este ano.
Grazas a este labor, explica a operadora, “ampliamos un ano máis a pegada efectiva da nosa cobertura 5G, alcanzando a un maior número de habitantes na Galicia que poderán descargar contidos a maior velocidade, navegar cunha menor latencia e ter un maior número de dispositivos conectados de forma simultánea sen perder calidade, mesmo en interiores de edificios; e tamén verán como mellora a calidade das chamadas de voz”.
Esta iniciativa reafirma o propósito da compañía por “conectar por un futuro mellor a través de redes móbiles Gigabit”.