Vodafone dá a coñecer máis tecnoloxías para mellorar e reforzar o despregamento das redes 4G
mércores, 26 de febreiro do 2014
Vodafone España presentou esta semana unha
serie de tecnoloxías para o facilitar e complementar o despregamento
e desenvolvemento das redes 4G. Trátase de tecnoloxías que
incorporan diferentes patentes impulsadas polo Centro de Competencia
de Radio de Vodafone España e que se dirixen a obxectivos como
mellorar a cobertura e a experiencia do cliente ou incrementar as
velocidades de descarga.
Precisamente cara optimizar o servizo é cara a onde
se dirixe Antena Activa, recurso incluído neste paquete de
novidades. Foi desenvolvido por Vodafone España xunto cos seus
subministradores. Antena Activa, que está arestora en fase piloto,
consiste en pasar os sistemas de radio tradicionalmente situados
dentro da estación-base ao interior da antena “dotándoa de
funcionalidades adicionais para adaptarse á posición dos usuarios
en tempo real”, informa a operadora. Esta tecnoloxía minimiza as
perdas na transmisión de sinal. Cómpre sinalar que o incremento de
cobertura pode chegar a superar o 40%, “o que incrementa
notablemente a área cuberta por cada antena, así como a propagación
ao interior dos edificios”, engade Vodafone, que nos recorda que en
base a esta tecnoloxía “chegáronse a medir incrementos da
velocidade de suba de datos á Rede de até un 60% e dun 50% en
baixada”.
Seguindo coas tecnoloxías que se están dando a
coñecer, dicir que a compañía tamén presentou novos servizos
LTE-A, e que se dirixen a incrementar as velocidades de descarga de
datos até 300 Mbps. De feito, Vodafone está a desenvolver probas
piloto en Madrid con módems LTE precomerciais empregando a rede
despregada nas bandas de 1800 e 2600 MHz e chegando a velocidades
sostidas superiores aos 280 Mbps e puntualmente superiores aos 297
Mbps, E aínda máis: a compañía informa que foi a primeira
operadora a nivel mundial en acadar, empregando LTE-A, engadir 4
portadoras para dar como resultado velocidades superiores a 540 Mpbs.