Vodafone botará man de algoritmos para evitar chamadas caídas e aumentar velocidades de descarga
martes, 16 de xaneiro do 2018
Vodafone
vén de dar importantes pasos en materia de Intelixencia Artificial
para os seus servizos de telecomunicación e, en última instancia,
mellorar a experiencia dos usuarios con melloras smart como,
por exemplo, incrementar a velocidade de descarga a través dunha
mellor xestión do tráfico. Este tipo de actualizacións, posíbeis
grazas a tecnoloxías como o Machine Learning, teñen (en boa
medida) a súa orixe en territorio español, a través do Centro de
Excelencia de Rede de Vodafone desenvolvido conxuntamente coas
compañías Ericsson e Huawei. Precisamente veñen de abrollar do
Centro uns
algoritmos de Intelixencia Artificial (AI polas súas siglas en
inglés) que posibilitarán que a rede móbil da operadora sexa quen
de elixir, de maneira automática e continua, a mellor alternativa
para que os usuarios teñan o mellor servizo. Grazas a estes
algoritmos, de xeito parello, reducirase o número de chamadas
caídas.
Segundo
lembra Vodafone, os algoritmos son recursos de Machine Learning e,
polo tanto, están dotados da capacidade de aprender automaticamente
dos erros e dos acertos. En base a isto, poderán extraer claves dos
niveis de sinal asociados ás distintas frecuencias, sabendo cales
son as mellores combinacións para cada conexión. Con estes
recursos, a operadora quere converterse en “pioneira a nivel
mundial en redes de AI”, impulsando infraestruturas de seu con
capacidade para facer predicións e anticiparse aos problemas
eliminándoos e optimizando a asignación de recursos.
En
termos máis concretos, os ditos algoritmos serán quen de elixir cal
é a mellor cela para asignar a cada usuario coa particularidade de
que o terminal non terá que medir o nivel de sinal que recibe da
rede. Isto permite duplicar a rapidez e maximizar a eficiencia no
balance de carga de tráfico entre celas próximas, no traspaso de
chamadas dunha cela a outra, e na elección das mellores frecuencias
para o uso de agregación de frecuencias.