Vitae móstranos como acadar contornas seguras no desenvolvemento de aplicacións
martes, 23 de outubro do 2018
Se
na actualidade hai unha cuestión de relevancia que deban ter en
conta os profesionais das novas tecnoloxías é a seguinte: como
protexer as súas contornas de traballo, os seus proxectos, as súas
comunicacións e a súa información ante as ameazas que proliferan a
través das redes? O tema da protección dixital, ademais, é un
deses temas multidireccionais que non deixan eido produtivo ou
administrativo sen atinxir: afectan ás empresas e ás
administracións, aos profesionais das TIC e aos de calquera outro
sector, aos traballadores dixitais e aos usuarios de a pé. En
consecuencia, a demanda de recursos que acheguen contornas seguras de
desenvolvemento non para de medrar. A consultora Vitae vén de lanzar
un curso en aberto para facilitar que esta demanda sexa atendida.
O
Curso
Introdución á Programación Segura ante Ciberataques inclúe 20
horas de formación e celébrase na Coruña (Hotel Attica 21) os días
26 e 27 de novembro e os 3 e 4 de decembro. Nesta actividade
formativa as e os asistentes “poderán adquirir os coñecementos
básicos precisos para o desenvolvemento seguro de aplicacións”.
En
termos máis concretos, o curso abrangue formación moi acaída para
desenvolvedores de ferramentas e servizos informáticos, afondando no
ámbito do backend con Java ou o frontend con Angular e
JavaScript, entre outras cuestións. “A nosa intención”,
comentan dende Vitae, é achegar recursos para a creación protexida
de aplicacións, partindo dun nivel introdutorio e facilitando os
coñecementos precisos para poder levar a cabo aplicacións seguindo
estándares de desenvolvemento seguro”.
Amais,
abordarase o proxecto OWASP así como a clasificación dos dez tipos
de vulnerabilidades máis frecuentes na creación de programas. Cada
posíbel punto feble detallarase tecnicamente, debullando os riscos
de representan, as técnicas de explotación ou as contramedidas a
pór na práctica. Asemade, debullaranse as boas prácticas a aplicar
para traballarmos protexidos dixitalmente con Java, JavaScript e
Angular, así como con S-SDLC.
O
encargado de impartir estes contidos é Deepak Daswani, experto
amplamente recoñecido a nivel internacional en materia de hacking
ético e ciberseguridade que ten fornecido servizos a entidades de
referencia no sector como INCIBE ou a firma Deloitte. É relator
habitual nas principais conferencias do sector e colaborador asiduo
de diversos medios de comunicación a nivel autonómico en Canarias,
estatal e internacional. Ten formado e asesorado a clientes como
Roche, a devandita Deloitte, Johnsson & Johnsson, Orange ou
Mapfre, entre outras compañías referencias.