Vitae mostra aos nosos profesionais como obter a máxima calidade no software
xoves, 6 de xullo do 2017
Vitae quere afianzar
entre os nosos profesionais as metodoloxías máis avanzadas de
validación e avaliación de programas en proceso de desenvolvemento.
Ou sexa, os recursos máis innovadores para que non se lles escape
ningún detalle durante o proceso de creación dunha ferramenta. Con
este motivo, Vitae organiza a cuarta edición do Curso
Certificación ISTQB en Fumdamentos en Testing (formato PDF).
Este obradoiro, en palabras da consultora-academia galega, céntrase
na área do testing comezando polos alicerces da avaliación
pormenorizada do software, explicando as diferentes probas que se
poden realizar así como o deseño destas e as ferramentas existentes
para realizar proxectos de testing a nivel profesional. O
curso, de 16 horas, desenvolverase na Coruña no Hotel Attica 21 os
días 18 e 19 de setembro.
A base do obradoiro está
na importancia cada vez maior que as empresas, os profesionais e as
entidades de todo mundo lle dan a un programa sen fisuras. En
palabras de Vitae, “a calidade no desenvolvemento do software é
unha vantaxe competitiva e para acadar esta vantaxe é preciso dispor
dos coñecementos e os recursos necesarios”.
O curso dá a opción de
Certificación en Fundamentos de Testing polo ISTQB, un programa de
certificación (polas súas siglas International Software Testing
Qualifications Board) recoñecido como un estándar internacional
para todos os profesionais do testeo de software.
Os obxectivos son
“fornecer dos procedementos e métodos de meirande relevancia en
probas que capacitarán ao asistente para xestionar, planificar,
deseñar e executar probas de programas coa meirande eficacia”.
Grazas ao curso, os asistentes poderán entender os conceptos clave e
fundamentos das validacións, asegurar un alicerce sólido para o
medre profesional e entender técnicas básicas de probas de
software.
O encargado de impartir
os contidos será Aurelio Gandarillas Cordero, enxeñeiro en
Informática e enxeñeiro técnico industrial en Electrónica, con
máis de 25 anos de experiencia profesional no sector TI e máis
dunha ducia de anos de bagaxe como consultor e formador en
desenvolvemento e calidade do software.