Vitae lévanos da man ás potencialidades de AngularJS
mércores, 9 de marzo do 2016
Vitae
Consultores segue adiante coa súa completa oferta formativa para
esta primeira recta do ano 2016. Desta volta cómpre informar da
cuarta edición do seu curso
Programación Web Profesional con AngularJS (accesíbel en PDF),
unha actividade de 20 horas a desenvolver en Vigo e que xirará
arredor das potencialidades de AngularJS, como lembraremos unha
infraestrutura JavaScript MVC desenvolvida por Google que nos
permite, entre outras cousas, crear código ben artellado e construír
grandes aplicacións de interacción directa co usuario (front-end)
moi doadas de manter. Segundo contan dende Vitae, AngularJS “consiste
nunha serie de ferramentas integradas e modulares que posibilitan
facer mellores ferramentas web con menos código”.
O curso desenvolverase os días
15, 16, 22 e 23 de abril (os venres pola tarde e os sábados pola
mañá). Segundo informa Vitae sobre as posibilidades de uso que se
abren co seminario, a tecnoloxía AngularJS amplía o HTML e o
JavaScript “levándoos ao deseño profesional de aplicacións
empresariais”. Os obxectivos do curso son ensinar a desenvolver
ferramentas de negocio de calidade profesional empregando a estrutura
AngularJS de Google, amais de amosar en detalle as súas
posibilidades e a súa integración en casos prácticos. Ademais,
botarase luz sobre as características do dito framework
con outros semellantes como Backbone ou JQuery.
O curso está especialmente
dirixido a programadores de aplicacións web, especialmente aqueles
con experiencia noutras infraestruturas. Tamén será de utilidade
para programadores de backend,
aplicacións móbiles ou deseñadores de páxinas. Segundo advirte
Vitae, precísase unha experiencia previa básica en JavaScript e
HTML. A actividade levarase a cabo no Centro Social AFundación de
Abanca en Vigo, no 24 da rúa Policarpo Sanz. O formador será
Alberto Basalo, enxeñeiro técnico en Informática con dúas décadas
de experiencia como analista programador, xefe de proxectos e
formador en pequenas e grandes empresas. Basalo é, a día de hoxe,
socio director de AgoraBinaria e consultor asociado a Vitae
Consultores.