Vitae fornece formación para incrementar a eficacia na selección de profesionais TI
mércores, 14 de setembro do 2016
Vitae Consultores segue
adiante co seu intenso labor formativo para os profesionais da nosa
terra, un labor que aborda polo miúdo as facetas máis avanzadas e
de meirande potencial profesional e produtivo da Sociedade do
Coñecemento. Os días vindeiros, sen ir máis lonxe, vai organizar o
Curso
sobre Avaliación e Sección Avanzada de Perfís TI baseadas na
Neurociencia (en PDF).
A actividade formativa, especialmente encamiñada a directores de
proxecto e profesionais de recursos humanos, celébrase o vindeiro 6
de outubro na Coruña.
Trátase da segunda
edición dun curso que afronta de cheo un dos meirandes baleiros
metodolóxicos aos que se afrontan os profesionais responsábeis da
avaliación dunha/un candidata/o ao equipo laboral: a falta de
dispoñibilidade de ferramentas psicolóxicas básicas e axeitadas
para desenvolver nas mellores condicións posíbeis o devandito
traballo.
Segundo informa Vitae, “o
primeiro paso para avaliar a un profesional é o autocoñecemento, é
dicir, coñecerse a un mesmo para acadar a maior obxectividade á
hora de tentar coñecer outras persoas”. Neste curso forneceranse
estas ferramentas para o autocoñecemento e para a avaliación
doutros traballadores sexa cal sexa o modelo de exame que se
empregue.
Para Vitae, está claro
que o sector das novas tecnoloxías da información (o sector TI)
demanda arestora máis profesionais dos realmente dispoñíbeis no
mercado laboral. Isto, engade a firma galega, acaba por “xerarlles
tensións ás empresas en canto a cumprir os compromisos en calidade
e prazo cos seus clientes e en controlar os custes salariais e a
equidade interna dos mesmos”.
Deste xeito, a actividade
formativa que prepara Vitae para o 6 de outubro centrarase na
eficacia, “máis que na eficiencia”, para seleccionar candidatas
e candidatos e avaliar o desempeño das/os profesionais en contornas
de escaseza dos mesmos, “aínda que ambas facetas, a eficacia e a
eficiencia, son precisas para o éxito nos devanditos procesos”.
Segundo engade Vitae,
“neste curso proporcionarase un método e unhas ferramentas coas
que xa se conseguiu unha porcentaxe de éxito de máis do 90% na
selección de perfís TI, incluíndo perfís técnicos, perfís de
xefes de proxectos, perfís de desenvolvemento de negocio e perfís
de alta dirección.
A actividade formativa
desenvolverase na Coruña, no Hotel Attica 21, o xoves 6 de outubro
con horario de 9.30 a 13.30 e de 15.00 a 19.00 horas. O encargado de
impartir os contidos e as metodoloxías será Marcos Carbonell
García, profesional con máis de tres décadas de experiencia nos
sectores do deporte, as novas tecnoloxías e os recursos humanos.