Vitae capacítanos en abril nas funcionalidades de Microsoft Power Automate
mércores, 15 de marzo do 2023
Vitae
Consultores, a través do formato de aula virtual, vai organizar esta
primavera a segunda edición dunha actividade formativa moi indicada
para os profesionais que queiran mellorar o seu traballo diario, as
empresas que desexen optimizar a súa xestión e os desenvolvedores
de programas e ferramentas que busquen avanzar en excelencia, en
axilidade e en sinxeleza.
Trátase do curso Microsoft Power Automate, 2ª edición, de 18
horas de contidos, que se celebra os días 17, 19, 20, 24, 26 e 27 de
abril.
Segundo
explican dende Vitae, Power Automate é unha plataforma de código
baixo única, que abrangue tanto a Office 365, como o paquete
Dynamics 365, como o Azure como aplicacións de tipo independente.
Neste
curso en cuestión afondarase nas posibilidades da plataforma de
Microsoft, un servizo que permite a automatización integral do noso
día a día profesional e serve como un compoñente crucial da Power
Platform. Ademais, está deseñada para un emprego sinxelo e cómodo
entre usuarios empresariais ou departamentais, e entre a crecente
comunidade de desenvolvedores do mundo. Tamén ofrece a
funcionalidade necesaria para programadores experimentados.
Power
Automate, salienta Viate, está deseñada para admitir e satisfacer
as necesidades dos equipos e administradores de TI modernos,
automatizando funcións de Tecnoloxías da Información cotiás até
proporcionar seguridade, cumprimento e control sobre o uso e sobre a
execución de Power Automate en todo o ecosistema de TI.
“Power
Automate pódese empregar para a realización de tarefas sinxelas,
como a entrega programada de correos electrónicos, ou para
integrarse sen problemas con aplicacións empresariais, e tamén para
mellorar e automatizar procesos que son complexos para os
administradores de TI”.
Os
obxectivos do curso pasan polo seguinte: “Aprender as capacidades
de automatización de tarefas que ofrece Power Automate (antigo Flow)
dentro dos ecosistemas de Microsoft, dende os conceptos básicos até
aspectos máis avanzados”.
O
formador encargado de impartir estes contidos será David Bodero,
consultor en tecnoloxía e desenvolvedor informático, con sete anos
en postos de responsabilidade como xestor empresarial. Ten
experiencia internacional de tres anos e de cinco na supervisión e
dirección de equipos multiculturais de até 30 persoas. É un
adestrador experimentado en contornas presenciais e telepresenciais,
conta con máis de 1.500 horas impartidas, sobre todo en cursos
relacionados con ferramentas de produtividade (Microsoft Office),
sistemas e programación. Entre as empresas que formou ou asesorou
atópanse ASIME, La Voz de Galicia, PSA Citroen, Plexus, Softek,
Vector ou CLUN.