Vitae achéganos as claves dunha axeitada selección de perfís TIC

Vitae Consultores vai desenvolver os días vindeiros unha actividade formativa sobre como facernos cos profesionais das novas tecnoloxías máis acaidos para os nosos obxectivos e para a actividade de mercado das nosas empresas. O Curso Selección e Avaliación Avanzada de Perfís TIC baseadas na Neurociencia (formato PDF) está dirixido a directores de proxectos e profesionais de recursos humanos. Ten unha duración de 8 horas e celébrase nunha única xornada, a do venres 15 de xullo. Segundo informa Vitae acerca da finalidade deste obradoiro, “o sector tecnolóxico-dixital demanda arestora máis profesionais dos dispoñíbeis no mercado laboral e isto xéralles tensións ás empresas en canto a cumpriren os compromisos profesionais en calidade de prazo cos seus clientes e en controlar os custes salariais e a equidade interna dos mesmos”. O devandito curso céntrase en axudarnos a superar as ditas tensións.
Máis polo miúdo, envórcase na eficacia (“en que facer, máis que na eficiencia”) para seleccionar candidatos e avaliar o desempeño dos nosos profesionais en contornas de escaseza de profesionais, “aínda que ámbalas facetas, a eficacia e a eficiencia”, sinala Vitae, “son precisas para o éxito nos procesos de selección e avaliación”.
En definitiva, o obradoiro fornecerá un “método e unhas ferramentas coas que se teñen acadado porcentaxes de éxito de máis do 90% en selección de perfís TI, incluíndo perfís técnicos, perfís de xefes de proxectos, perfís de desenvolvemento de negocio e perfís de alta dirección”, explican dende Vitae, engadindo que o reto para os ditos procesos de escolma e análise é “ter un criterio para saber en que aspectos ceder e en cales non ceder na contratación dunha ou dun candidata/o ou na promoción dun dos nosos profesionais”.
O curso vai dirixido a directores e xefes de proxectos, xerentes ou profesionais de recursos humanos ou ben a calquera profesional que desexe adquirir as habilidades e os coñecementos para a selección e avaliación tanto de perfís tecnolóxico-dixitais como de calquera outro sector.
A actividade formativa celébrase o vindeiro 15 de xullo en horario de 9.30 a 13.30, e de 15.00 a 19.00 horas. A sede do obradoiro será o Hotel Attica 21 da Coruña.
O curso virá da man de Marcos Carbonell, profesional con máis de tres décadas de experiencia nos sectores do deporte, as novas tecnoloxías e os recursos humanos.