Vilanova acolleu a presentación de novos cruceiros e tecnoloxías turístico-marítimas
luns, 4 de abril do 2016
A Estación Marítima
Julio Camba de Vilanova de Arousa acolleu o pasado venres a
presentación da iniciativa Cruceiros Costeiros de Galicia, que
comezarán a súa actividade a partir do vindeiro día 15 cunha viaxe
inaugural dende o porto de Vigo. O acto comezou cunha breve
demostración dunha das aplicacións que se poderán usar nestes
cruceiros e nos portos nos que fagan escala. A aplicación foi
debullada pola Asociación
Galega de Actividades Náuticas e Portos,
impulsoras destes cruceiros. Trátase
dun noso sistema de “reserva desatendida” achegado pola firma
Human Soft, co que os pasaxeiros poderán acceder os portos e
outros edificios mediante os seus smartphones (dispositivos
intelixentes ou smartwatchs (pulseiras e reloxos
intelixentes). A través da aplicación, sinalouse, “os visitantes
non padecerán as restricións de horario que teñen algúns portos
con escaso persoal, podendo acceder a calquera hora do día as súas
embarcacións”.
Participaron no acto de
Vilanova o presidente de Portos de Galicia (organismo público que
participa na iniciativa como socio) José Juan Durán; en
representación da Axencia de Turismo de Galicia, Carmen Pita; a edil
do Concello de Vilanova, Nuria Morgade; o director da empresa Human
Soft, Rodrigo Antepazo, e o vicepresidente da Asociación Galega de
Actividades Náuticas (AGAN), Ignacio Bolíbar. Todos eles
coincidiron en destacar o porto arousán como “referencia de porto
amigábel polo emprego das novas tecnoloxías que ofrecen os
devanditos cruceiros”.
Na xuntanza cos medios
celebrada en Vilanova tamén se deu a coñecer (con demostración
incluída) outra das grandes novidades tecnolóxico-marítimas que
pon en xogo a firma de Moaña Human
Soft, e trátase dunha iniciativa de realidade aumentada que
permitirá aos visitantes coñecer e ter información inmediata e
actualizada, nos seus dispositivos intelixentes, das vilas, cidades,
paraxes naturais costeiras e monumentos que visiten. “Deste xeito”,
díxose, “os participantes destes cruceiros poderán coñecer en
profundidade elementos do nosos patrimonio histórico e cultural coma
son as illas Cíes ou diversos museos e monumentos, incluíndo as
lendas que os rodean”.
Estes cruceiros ofertan
dúas modalidades. A primeira é Tesoros de las Rías de Galicia,
que inclúe tres días de navegación, e o Crucero Islas
Atlánticas y villas marineras, que ofrece rutas de dous días
polas rías, de xeito individual ou un paquete completo das tres
xornadas.
Tamén se fixo saber que
durante unha semana, na mesma estación marítima de Vilanova, estará
dispoñíbel unha exposición dixital dos contidos que se poderán
visitar nestes cruceiros. Desta maneira, mediante tabletas, os
visitantes poderán acceder a vídeos e diverso material sobre todos
os recunchos das nosas rías que abrangue a iniciativa, así coma
probar algúns dos novidosos produtos que ofrece.
Os cruceiros serán
operados polas navieiras InterRías-Náutico Cormorán, que farán o
circuíto polas rías, e por Mareal Cruceros, que se encargará do
das Illas Atlánticas. Con estes cruceiros, que se iniciarán coa
primeira saída o 15 deste mes (data da chegada de Cristobal Colón a
España en 1943), agárdase que arredor de 10.000 persoas poidan
participar nestas saídas ao longo do ano.