Vigo suma 13 novas rutas interactivas aos itinerarios da súa app
martes, 30 de marzo do 2021
Dende
este luns 29 de marzo, a
aplicación móbil Vigo incorpora 13 rutas medioambientais
dispoñíbeis para residentes e visitantes, achegándolles outras
tantas oportunidades de coñecer os múltiples tesouros naturais,
paisaxísticos e culturais da cidade e a súa contorna. En total, a
ferramenta
Vigo pon a disposición dos usuarios un total de 21 itinerarios
para, en palabras do Concello, “gozar da cidade”.
O
alcalde Abel Caballero salientou que as rutas interactivas da
aplicación Vigo, un proxecto financiado con fondos FEDER DUSI
da Unión Europea, foron premiadas xunto á plataforma Smart Cuty de
Vigo nos premios Smart Cities & Communities de Europa e Asia
Central na edición de 2020, celebrada en Rusia.
As
novas incorporacións son tres sendeiros azuis: Camiño a
beiramar, seguindo o río Lagares ata a costa, con dúas
variantes: ata Canido e ata Bouzas; tamén o camiño entre faros nas
Cíes e o sendeiro Litoral e do Monte da Guía. Amais,
incorpóranse varios percorridos locais: Bembrive-Beade, Cabral,
Candeán, Coruxo, Oia, Saiáns, Valadares, Zamáns e Matamá-Comesaña,
sumando un total de 21 propostas interactivas.
Caballero
convidou a “gozar da cidade” a través destas rutas
medioambientais que cualifica como “magníficas opcións para
aproveitar os festivos e o resto dos días para pasear polo verde de
Vigo” de forma cómoda porque a aplicación, desde o móbil, envía
indicacións para facer as rutas e sinala os elementos de interese na
zona que se visita.