Vigo Tecnolóxico xunta 600 investigadores en biomedicina, telecomunicacións, industria e espazo

A semana pasada formalizouse a “botadura” de Vigo Tecnolóxico na sede de Afundación en Vigo, unha iniciativa que, seguindo o ronsel do Campus do Mar, do Campus da Auga e do Campus CREA S2i, diríxese a especializar o campus vigués nos ámbitos biomédico, da industria e a enerxía, das telecomunicacións e do eido aeroespacial. A iniciativa, coa que se busca impulsar ao máximo a transferencia tecnolóxica (establecendo máis e mellores pontes entre os ditos ámbitos de traballo e as nosas empresas), xunta máis de 600 investigadoras e investigadores da Universidade de Vigo, 180 das/dos cales desempeñan o seu labor (nos eidos da privacidade, a seguridade, a análise, os sinais biomédicos, as redes de datos, as comunicacións espaciais e os servizos electrónicos) no Centro de Investigación en Tecnoloxías de Telecomunicación, AtlantTIC.
No caso da agrupación estratéxica Industria e Enerxía, Inex, preto de 250 investigadoras e investigadores traballan nos ámbitos das redes eléctricas intelixentes, a industria 4.0 e as fábricas do futuro, así como os novos materiais e a valorización de recursos e refugallos.
O resto, desenvolve o seu labor no Centro de Investigacións Biomédicas.
Vigo Tecnolóxico foi presentado (entre outras persoas) por Edita de Lorenzo, comisionada do Vigo Tecnolóxico. No acto, amais de dar información sobre a iniciativa, rendéuselle homenaxe, entregándolle a insignia de ouro da Universidade, a quen foi o seu primeiro comisionado, o ex vicerreitor José Antonio Vilán, que prosegue co proceso de recuperación do atropelo que sufriu, cando circulaba en bicicleta en marzo de 2016. “O Vigo Tecnolóxico é unha realidade e vai por ti José Antonio”, dixo o reitor en funcións Salustiano Mato que gabou o traballo desenvolvido polo primeiro comisionado cualificándoo de “motor e de peza indispensábel na relación co tecido empresarial do sur de Galicia”.
No acto tamén se lembrou que a Estratexia 2025 é a que define as prioridades do Vigo Tecnolóxico: formación, investigación, transferencia, posicionamento estratéxico, que se relaciona cos centros, asociacións e institutos de investigación e co tecido empresarial da contorna co obxectivo de se converter nun axente dinamizador do sistema da I+D+i galega nos ámbitos biomédico, da industria e a enerxía, telecomunicacións e aeroespacial.