Victor Salgado: “A nova Lei de IA é un punto de inflexión para protexer os dereitos das persoas”
martes, 12 de decembro do 2023
Desde
Pintos & Salgado,
bufete coruñés especializado no ámbito virtual, analizan o
paso adiante dado pola Unión Europea en materia tecnolóxica coa
recente aprobación do marco lega para a Intelixencia Artificial, un
paso que o butefe galego cualifica de “histórico”. En palabras
do avogado e experto en dereito TIC Víctor Salgado, esta primeira
normativa permite “regular non tanto a tecnoloxía, senón os seus
efectos sobre as persoas, os actuais e os futuros”.
“Un
acordo político histórico”. Esas son as palabras que utiliza
Víctor Salgado, avogado coruñés de Pintos & Salgado experto en
dereito dixital e intelixencias artificiais, para definir o vivido
este fin de semana pasado no seo de Bruxelas: a aprobación do texto
da primeira Lei da IA. Segundo lembra o experto, “cando a Comisión
Europea propuxo a súa formulación, en abril de 2021, nin sequera
existía ChatGPT, e agora este novo regulamento enfróntase ao reto
de ser o suficientemente flexíbel como para regular a evolución
dunha tecnoloxía que cambia a ritmo de vertixe, pero sen restrinxir
os seus procesos de innovación”.
A
xuízo de Víctor Salgado, “que a UE se converta en pioneira nesta
normativa constata a súa traxectoria: podemos dicir que é a rexión
do mundo que mellor protexe os dereitos fundamentais dos seus
cidadáns na contorna dixital”. E continúa: “A Unión Europea
ten traballado moito previamente en materia de protección de datos e
redes sociais, pero a Lei da IA é un punto de inflexión, a primeira
gran resposta legal a nivel mundial”.
Para
Salgado, máis aló do calado histórico, o regulamento presenta unha
característica interesante e moi necesaria desde un punto de vista
legal: a súa flexibilidade. “Tardará máis de 2 anos en entrar en
vigor, e iso implica que durante o proceso de implementación da lei
a IA vai evolucionar moito e a un ritmo moi rápido. Pero a normativa
é consciente diso e por este motivo non regula tanto a tecnoloxía
en si mesma, senón os seus efectos sobre as persoas. É, por tanto,
unha lexislación que entende a necesidade de adaptarse, de
incorporar unha certa marxe de actuación e unha estrutura menos
ríxida para que se poidan introducir cambios sen pasar por procesos
de tramitación moi dilatados no tempo”.
Para
o avogado galego, a vixilancia biométrica e a autorregulación son
dúas das claves fundamentais da nova norma: “A Lei é rotunda en
prohibir unha serie de actividades que poden erosionar dereitos
fundamentais da cidadanía. En concreto, limítase de maneira
considerábel a vídeo-vixilancia masiva con Intelixencia Artificial,
denominado na normativa como vixilancia biométrica: un sistema de
recoñecemento facial altamente efectivo, pero que ofrece aos
gobernos formas de control cidadán que chocarían cos seus propios
dereitos e liberdades”.
Salgado
contextualiza as limitacións desta tecnoloxía de vídeo-vixilancia,
un dos ítems de maior conflito na xestación da nova lei:
“Precisarán sempre de autorización xudicial, e utilizarase
principalmente para localizar a sospeitosos de crimes moi concretos,
como terrorismo, asasinato, secuestros, violacións, tráfico ou
roubo armado. Ademais, só a poderán empregar os Corpos e Forzas de
Seguridade do Estado”.
Situando
o foco máis aló deste aspecto, desde Pintos & Salgado tamén
expoñen un segundo elemento a ter en conta, e é que o regulamento
vai permitir unha certa autorregulación: “Tamén se entende que a
IA vai ser un motor de innovación para a UE nos vindeiros anos, e
por iso a lei permite que os desenvolvedores de IA se autorregulen;
deséxase garantir que evolucione, pero iso si, de forma segura.
Equilibrar innovación tecnolóxica e seguridade xurídica será o
gran reto dos próximos anos”.