Vector ITC sinala que o Big Data é a solución á contaminación xerada polo consumo nos edificios
venres, 20 de febreiro do 2015
A empresa Vector
ITC Group, centrada e innovación intelixente e cunha das súas
sedes na Coruña, emitiu estes días un interesante informe sobre o
consumos de enerxía innecesarios e emisións de CO2 que ben podían
deixar de emitirse. Segundo fai saber a compañía, non é o
transporte urbano, tal como se pensaba, o principal consumidor de
enerxía nas cidades, senón os edificios. Estes, sinalan, abranguen
a día de hoxe o 40% do total da enerxía consumida, o que representa
o 36% das emisións de gases contaminantes da Unión Europea. Boa
parte deste gasto, como era de agardar, é evitábel. Tanto en
edificios públicos como privados, de institucións, de empresas ou
de vivendas: hai un exceso en todos os ámbitos, exceso que en moitas
ocasións prexudica aos propios ocupantes. Segundo apunta Vector ITC,
este estrago de recursos pode solucionarse botando man das novas
tecnoloxías.
Por exemplo, das
tecnoloxías Big Data, que teñen capacidade para calcular, avaliar e
tratar os datos de consumo de enerxía e que, a curto e medio prazo,
poden supoñer aforros en custes de até o 20%.
Vector ITC Group sinala
polo tanto que o concepto de Big Data é xa un recurso imprescindíbel
para acadarmos de verdade edificios sustentábeis. Ou sexa,
construcións onde se minimice o emprego das enerxías convencionais
que as alimentan para mantelas en todo intre nun nivel de “confort
aceptábel”. Para Vector ITC Group hai dous escenarios de actuación
para a mellora da eficiencia enerxética dun edificio: segundo a
lexislación vixente e segundo referencia interna. O obxectivo, dise,
é acadar unha boa nota no Certificado de Eficiencia Enerxética, que
varía desde a clase A, para os máis eficientes, á clase G, para os
menos eficientes. “Grazas ás técnicas de Big Data”, explican os
responsábeis da compañía, “pódense transformar os datos
recompilados en información e despois en coñecemento, e deste xeito
identificar que edificios non cumpren cos estándares de eficiencia
enerxética e elaborar logo un plan de acción que alcance uns
obxectivos de consumo axeitados e obter unha categoría no
Certificado de Eficiencia Enerxética superior”.
Para entendermos o
devandito, a empresa pon o exemplo dunha iluminación que nun
edificio xere un consumo excesivo. O sistema detectarao e achegará
respostas acaidas, como implantar sistemas de autoapagado ou empregar
lámpadas de baixo consumo. Estas conclusións e estes recursos a ter
en conta, explica a compañía, poden conseguirse a través de
módulos de eficiencia que permitan deseñar plans de actuacións,
establecendo métricas que son seguidas e controladas no tempo e que
abren o camiño para a sustentabilidade. As métricas xerais son a
ocupación do edificio, a electricidade, iluminación e
climatización, os equipos informáticos empregados e o illamento.
Outros parámetros non menos importantes son o consumo de auga,
papelería e plásticos consumíbeis ou o emprego de enerxías
renovábeis, explica a empresa Vector ITC, con sedes na Coruña, en
Madrid e distintos países de América Latina e con longa experiencia
en materia de innovación intelixente.