Uns vinte alumnos do CEIP Benigno Quiroga de Lugo reciben o carné de ciberexpert@s
luns, 20 de marzo do 2023
A
subdelegada
do Goberno en Lugo, Isabel Rodríguez, participou este luns 20 na
entrega de carnés de ciberexpert@s a 18 alumnas e alumnos do
CEIP Plurilingüe Benigno Quiroga Ballesteros, en Lugo, que
participaron no curso de Ciberexpert@ impartido pola Policía
Nacional. Na cita coa rapazada a subdelegada salientou a formación
que ofrece os axentes aos escolares da provincia “para previlos dun
mal uso de Internet e as redes sociais e evitar así ser vítimas de
ciberdelitos”. E engadiu: “Un de cada cinco delitos que se
cometen en Galicia son telemáticos, de aí a importancia de fomentar
entre os mozos e mozas un uso responsábel das redes sociais,
protexendo sempre os seus datos e a súa intimidade”.
A
subdelegada felicitou a todos os nenos e nenas e destacou a
necesidade de concienciar aos menores, nativos dixitais, dos perigos
aos que se expoñen nas redes e facilitarlles ferramentas para unha
boa xestión da súa información. No acto tamén participaron o
delegado de Participación Cidadá da Policía Nacional, Rubén Darío
Veiga, e a directora do centro, Marta Randulfe.
Isabel
Rodríguez informou que tanto a Policía Nacional como a Garda Civil
están a facer “un gran labor educativo nesta materia ofrecendo
charlas nos centros educativos da provincia”. Un deses programas de
formación é o Ciberexpert@, que imparte a Policía Nacional
e que chegará a 350 alumnos de 6º de primaria do concello de Lugo,
con charlas en varias xornadas.
Co
desenvolvemento desta iniciativa, a Policía Nacional trata de
sensibilizar e formar aos menores co obxectivo de “minimizar os
riscos que poden atopar no uso cotián das Tecnoloxías da
Información e a Comunicación”. Tamén se pretende familiarizar
aos menores e á súa contorna educativa e familiar no uso de
ferramentas para unha navegación máis segura e capacitar aos
escolares no uso responsábel das redes sociais.
Neste
curso participaron nesta formación escolares do CEIP Sagrado
Corazón, CEIP Manuel Mallo Mallo, CEIP Quiroga Ballesteros, CPR
Salesianos, CEIP Rosalía de Castro, CEIP Casás e CEIP Illa Verde.
Ademais, para as próximas semanas están programadas sesións no
CEIP de Albeiros e CEIP A Ponte. En total, escolares de 9 centros
lucenses recibirán formación de identidade dixital, redes sociais,
suplantación de identidade, ciberacoso, sexting, grooming e
tecnoadicións, entre outras.