Unha única xanela telemática conectará ao contribuínte cos diferentes rexistros da Axencia Tributaria de Galicia
venres, 7 de setembro do 2012
O presidente da Xunta, Alberto Núñez Feijóo, avanzou
recentemente a
posta en marcha, en xaneiro de 2013, da primeira Axencia Tributaria de Galicia,
unha entidade que se prevé que sexa máis eficiente na prevención da loita
fiscal e coa se pretende mellorar o servizo á cidadanía, ao tempo que “se aforrarán uns 15 millóns de euros en
catro anos”, segundo informou o Executivo.
Isto suporá levar a cabo, entre outras cousas, un
exercicio de “simplificación
administrativa”, explicou Feijóo, mediante o que se eliminará a Dirección
Xeral de Tributos, cinco departamentos territoriais, cinco zonas de recadación
e 42 oficinas liquidadoras, que “pasan a
converterse en oficinas de presentación de documentación, pero non de liquidación
de impostos”, aclarou o presidente.
As novas tecnoloxías xogarán un papel importante nesta
nova entidade pública galega, ao ter previsto crear unha xanela telemática única
coa que se poida conectar ao contribuínte cos diferentes rexistros, tanto da
Propiedade como Mercantil.
Con esta plataforma en liña tamén se mellorará o servizo
de apoio ao contribuínte, aportando información de utilidade, reducindo trámites
e achegando asistencia no tocante á xestión tributaria cando sexa necesario.