Unha nova páxina web recolle centos de fotografías ao redor das clásicas motos Vespa

Juan Carlos Pazos, Pablo Osorio e Roberto Hernández presentaron a nova páxina web esta mañá

Esta mañá a Sala de Conferencias do Museo MARCO de Vigo acolleu a presentación unha nova páxina web chamada Cualquier Tiempo Pasado, creada por iniciativa da asociación Vespeinados, que xunta centos de imaxes que queren servir para rexistrar a pegada deixada polas míticas motos Vespa no contorno de Vigo entre as décadas dos 50 e 80.
O arquivo fotográfico deste novo espazo na Internet conta cunhas 600 imaxes, acompañadas pola súa historia, e complementadas por unha sección de garaxe á que van a parar distintos obxectos asociados aos clásicos ciclomotores, como cascos, insignias e lentes protectoras.
Aínda que a nova web abriu as súas portas hoxe, os seus responsables levan un tempo adiantando os seus contidos a través de Facebook, pois consideran que as plataformas sociais poden contribuír a enriquecer este museo virtual que debería de ser do agrado de nostálxicos ou de curiosos que queiran saber algo máis deses vehículos presentes en moitas historias dignas de ser escoitadas.