Unha ferramenta desenvolvida no CiTIUS, premiada no congreso CIRCLE 2022 de Toulouse
venres, 15 de xullo do 2022
Do 4
ao 7 de xullo a Universidade francesa de Toulouse acollía ao
congreso internacional que serve de eixo anual ás comunidades do
eido científico de Recuperación de Información en Europa (Joint
Conference of the Information Retrieval Communities in Europe-CIRCLE
2022). Nesta edición premiouse ao talento galego, en concreto á
demo-paper Social
Minder, unha ferramenta desenvolvida no CiTIUS para detectar
información falsa sobre o COVID-19 en redes sociais.
Así,
un dos responsábeis deste enxeño, o investigador Marcos Fernández
Pichel, recolleu o recoñecemento en Toulouse logo de presentar o
traballo na sección de Demos e Pósters do
congreso: “Estamos moi contentos de que Social Minder tivese
esta gran acollida entre o público asistente”, afirma o
investigador predoutoral do centro. “Esta plataforma serve para
detectar tendencias de credibilidade en Twitter, pero tamén podería
aplicarse a outros usos como, por exemplo, monitorizar os produtos
dunha compañía e as súas mencións ou un determinado grupo
poboacional”, explica.
Volvendo
a Social Minder, dicir que
estamos perante unha plataforma en liña que analiza en tempo
real os contidos e o grao de credibilidade das publicacións
relacionadas coa saúde en Redes Sociais. Emprega Tecnoloxías Big
Data para o procesamento eficiente de datos masivos, e Tecnoloxías
da Linguaxe e Intelixencia Artificial para a predición da
credibilidade. A listaxe de responsábeis desta ferramenta complétase
cos investigadores vinculados do CiTIUS: David E. Losada e Juan
Carlos Pichel.
Engadir
por último que a dita aplicación é de acceso libre e gratuíto, e
o seu funcionamento pode consultarse na ligazón
especifica habilitada dende o centro compostelán.