Unha campaña contra Amazon no Reino Unido podería derivar nunhas perdas de máis de 3,5 millóns de libras
xoves, 11 de decembro do 2014
A Amazon probablemente
non lle van ir moi ben as vendas na campaña de Nadal na que xa
estamos en maior ou menor medida mergullados, ou polo menos non tan
ben como desexaría. Sobre todo no Reino Unido, que
é onde se está a impulsar o que se considera o meirande boicot
rexistrado na historia do país contra o xigante das vendas en
Internet. A raizame da campaña contra Amazon hai que rastrexala
en 2013, cando a activista Emily Kenway puxo en marcha unha
mobilización na plataforma Change.org para forzar á devandita
empresa a mellorar as condicións laborais dos seus traballadores no
Reino Unido (basicamente subirlles o soldo até un mínimo
aceptábel).
Froito desta campaña
(apoiada por máis de 65.000 persoas) creouse unha páxina
específica, Amazon
Anonymous (A.A.), dende a que se convida aos internautas do país
a non mercar nada a través da canle de venda da empresa mentres esta
non emende as ditas condicións laborais. Esta nova arremetida conta
a multinacional vai
acompañada doutra campaña en Change.org que xa anda a rentes
(este xoves 11 de decembro) dos 130.000 apoios. A través dela,
pídeselle a Jeff Bezos que este Nadal lles pague aos seus
traballadores un soldo para vivir.
Segundo se estima, as
perdas para a compañía derivadas destas acción poderían acadar
máis de 3,5 millóns de libras. Segundo se fai saber en Amazon
Anonymous, a empresa sitúa os seus almacéns en zonas deprimidas
onde non hai outra alternativa para os traballadores. Igualmente,
critícase que non pague impostos en Reino Unido, “malia conseguir
máis de 7.000 millóns en vendas só entre 2009 e 2011”.