Unha aplicación galega mide o grao de felicidade das persoas a partir das súas expresións faciais
martes, 29 de maio do 2012
- O proxecto piloto probarase na web Deporfelicidad.com, na que se medirá o grao de felicidade dos seareiros do Deportivo
Por sorte, malia que moitas veces non nos damos conta por mor da mala
etapa que está a sufrir a nosa economía, aínda hai moitas cousas que conseguen
arrincarnos un sorriso cada día, e que contribúen a que a nosa felicidade non
se vaia desgastando, por moito que aumenten os desgustos sufridos na vida.
Cousas como o nacemento dun bebé, a chegada do bo tempo, a visita dun
vello amigo, a sorpresa dun familiar ou o ascenso do noso equipo, contribúen
notablemente a incrementar a nosa
felicidade, porén, canto?, en que grao?; agora, grazas a unha aplicación
tecnolóxica desenvolvida polo Centro Tecnolóxico de Telecomunicacións de
Galicia, podemos medir cuantitativamente o grao de felicidade dun suxeito
calquera, a partir do recoñecemento automático das súas expresións faciais.
Trátase dun
proxecto pioneiro desenvolvido polos enxeñeiros Daniel González Jiménez e
Luis Pérez Freire nas instalacións que o Centro ten na Universidade de Vigo,
que utiliza múltiples sensores para modelar e comprender comportamentos e
estados afectivos e cognitivos humanos como a felicidade, a tristeza, o medo, a
sorpresa, o interese ou o aburrimento, entre outras cousas.
Esta tecnoloxía, segundo informan no xornal
dixital La Voz de Galicia, “está
totalmente finalizada e lista para saír ao mercado” e Gradiat xa está en
contacto con varias empresas interesadas en incorporalas en diferentes usos,
tanto no mundo da publicidade e o marketing,
como da seguridade, o ocio ou mesmo na axuda a colectivos de persoas con algún
tipo de discapacidade.
A aplicación
na web www.deporfelicidad.com
Aproveitando
o recente ascenso do Deportivo da Coruña á máxima categoría do fútbol español,
que fixo felices a moitas e moitos seareiros, a aplicación vai ser probada por
primeira vez nunha páxina web creada para tal fin, que leva por nome Deporfelicidad.com e que vai permitir
usar a tecnoloxía para medir o grao de felicidade da afección polo ascenso do
seu equipo.
A iniciativa
consiste en enviar fotos da celebración para que o sistema poida cuantificar o
sentimento a partir das imaxes recibidas. Todas as persoas que desexen
participar poderán facelo durante os vindeiros sete días, enviando as súas
fotos de felicidade á dirección de correo electrónica: foto@deporfelicidad.com.
A
organización do evento establece tres categorías: unha para as fotos en grupo,
outra para as fotos individuais e unha terceira na que se premiarán as
fotografías máis divertidas e singulares de todas as recibidas.
As
fotografías deberán achegarse en formato .jpg
e todas elas serán procesadas polo sistema de Gradiant, porén tan só obterán
boa puntuación as que teñan caras ben visibles.