Un sistema español de realidade virtual permite distraer aos doentes durante as intervencións
xoves, 30 de agosto do 2012
Son
moitas as investigacións que demostran que o medo á dor aumenta considerablemente
a sensibilidade ao mesmo, e de feito, o medo ao dentista non só é unha das
principais causas de sufrir dor durante a intervención, senón tamén que é “o factor máis influínte na calidade de vida
relacionada coa saúde dental”, segundo un informe publicado en BMC Oral
Health no pasado xuño.
Porén,
esta e outras fobias similares poderían verse atalladas cun sistema de
realidade virtual deseñado aquí en España, que leva por nome Isla Calma, e que
permite distraer ao doente mentres este se somete a unha intervención ou
cirurxía menor.
Trátase
dunha aplicación tecnolóxica desenvolvida pola empresa española Nesplora, que aproveita
as vantaxes da realidade virtual para que, a través dunhas lentes 3D, o doente
se poida somerxer nun escenario relaxante e interactuar con el, esquecendo así
a dor ou a fobia á intervención.
O
sistema ten a súa principal aplicación nas consultas dentais, onde as persoas
con aversión ao dentista ou que prefiren distraerse mentres se realiza o
procedemento poden somerxerse neste escenario virtual e estar máis distraídas,
porén tamén é útil para unidades onde se realizan procedementos molestos ou
dolorosos, como as biopsias, ou de
tratamentos crónicos como as infusións de medicamento ou as diálises.
Segundo
Unai Díaz, psicólogo de Nesplora que participou no desenvolvemento de Isla
Calma, “os estudos nos que se basea esta
aplicación mostran que os pacientes teñen menos náuseas, presión arterial máis
baixa e piden menos analxésicos tras o tratamento se se conectan ao dispositivo
virtual”, afirma.
A
aplicación, que conta cun programa de ata tres horas de duración, pode
interromperse e reanudarse en calquera momento, e conta con 8 escenarios
diferentes nos que se desenvolve a acción: dende un xardín xaponés cun estanque
de carpas, ata un mar calmo ou unha colonia de tartarugas.
As
gafas permiten illar á persoa por completo ou deixarlle ver o que pasa ó seu
redor mentres xoga ou interactúa en cada entorno, mentres que a música, a
paisaxe e os animais axudan a que o doente estea máis relaxado durante a
intervención, permitíndolle aos profesionais desenvolver o seu traballo de
xeito efectivo.