Un nutrido grupo de enxeñeiros galegos en informática participará no curso de eAdministración da EGAP

Fernando Suárez, presidente do CPEIG, tamén estará presente no curso

A Escola Galega de Administración Pública vai dar acubillo o vindeiro día 26 ao Curso Superior de Administración Electrónica, unha actividade formativa que, como o seu propio nome indica, diríxese a ampliar cara a un nivel alto de coñecemento a capacidade de adaptación aos novos contornos dixitais do noso funcionariado. O curso contará entre outros apoios co labor de asesoramento e divulgación do Colexio Profesional de Enxeñaría en Informática de Galicia (CPEIG), que estará representado na actividade formativa polo seu presidente, Fernando Suárez, e por un bo número de integrantes-relatores. Segundo informa o Colexio, os integrantes do mesmo intervirán activamente nos módulos I e II, dedicados ao Fundamento de Tecnoloxías e Sistemas de Información, e Informática e Dereito, respectivamente.
Máis polo miúdo, o CPEIG achega os seguintes docentes para o desenvolvemento das ditas materias: Juan Otero Pombo, Jesús Rodríguez Castro, Antón Campos Silva, Juan Antonio Valiño García, Miguel Ángel Molinero Álvarez e Miguel Ángel Otero, á parte do devandito Suárez Lorenzo.
O Curso Superior de Administración Electrónica desenvolverase na EGAP os martes e xoves, das 17.00 ás 20.00 horas, ata o 15 de xullo. Precisamente este venres día 19 remata o prazo de inscrición para poder asistir á actividade. As persoas interesadas nesta actividade poden achar máis información na web da escola pública.